మీడియాపై పట్టలేనంత కోపం తెచ్చుకున్న దర్శకుడు

తమిళ సూపర్ స్టార్ రజినీకాంత్ హీరోగా తెరకెక్కిన కబాలి, ప్రస్తుతం సూపర్ స్టార్ హీరోగా సెట్స్‌పై వున్న కాలా చిత్రాలకి దర్శకుడైన పా రంజిత్‌కి మీడియాపై ఆగ్రహం కట్టలు తెంచుకుంది. నీట్‌‌లో సీటు సాధించలేకపోయాననే మనస్థాపంతో ఆత్మహత్య చేసుకున్న అనిత గురించి ప్రస్తావించే ప్రతీసారి మీడియా సంస్థలు ఆమెని దళిత యువతి, దళిత యువతి అని సంభోదిస్తున్నాయని పా రంజిత్ ఆగ్రహం వ్యక్తంచేశాడు. తమిళులంతా ఏకమై ఓవైపు నీట్‌కి వ్యతిరేకంగా పోరాడుతోంటే.. ఇదే క్రమంలో ప్రాణాలర్పించిన తమిళనాడు యువతి అనితకు మాత్రం కులం రంగు పులిమి తమిళులని కులం పేరుతో విడదీయాలని చూస్తున్నారని మండిపడ్డాడు.

అనిత ఆత్మహత్య నేపథ్యంలో నీట్ నిర్వహణకి వ్యతిరేకంగా నిరసన తెలిపేందుకు తమిళ సినిమా ఆర్టిస్టులు ఏర్పాటుచేసిన సమవేశంలో మాట్లాడుతూ పా రంజిత్ ఈ వ్యాఖ్యలు చేశాడు. మరో దర్శకుడు అమీర్ వెళ్లి పా రంజిత్‌కి నచ్చజెప్పేందుకు ప్రయత్నించినప్పటికీ అతడు మాత్రం శాంతించలేదు. దీంతో అమీర్, పా రంజిత్ మధ్య వాగ్వీవాదం చోటుచేసుకుంది.