యూట్యూబ్‌లో ‘రజనీ’ సంచలనం

రజనీ ‘కబాలి’ చిత్రం హవా ఇంకా తగ్గలేదు. ఈ సినిమా థియేటర్స్‌లో విడుదలై పర్వాలేదనిపించినా.. కబాలీ ట్రైలర్ మాత్రం యూట్యూబ్‌లో సంచలనంగా మారింది. సూపర్‌స్టార్‌ రజనీకాంత్‌ ‘కబాలి’ చిత్రం ట్రైలర్‌ ఈ ఏడాది యూట్యూబ్‌లో టాప్‌ ట్రెండింగ్‌లో నిలిచింది. బుధవారం 2016 టాప్‌ 10 ట్రెండింగ్‌లో ఉన్న వీడియోలు, మ్యూజిక్‌ వీడియోలు, బాలీవుడ్‌ ట్రైలర్ల జాబితాను యూట్యూబ్‌ విడుదల చేసింది. ఇందులో రజనీకాంత్‌ ‘కబాలి’ చిత్రం టాప్‌ ట్రెండింగ్‌ ట్రైలర్‌గా ఉందని, కపిల్‌శర్మ షోకు సల్మాన్‌ ఖాన్‌ అతిథిగా వెళ్లినది టాప్‌ ట్రెండింగ్‌ వీడియోగా ఉందని యూట్యూబ్‌ ప్రకటించింది.

కొత్త రూ. 2000 నోటుకి జీపీఎస్‌ చిప్‌ ఉందా అన్న విషయానికి సంబంధించిన ఒక వీడియో కూడా ట్రెండింగ్‌లో ఉందని పేర్కొంది. 2016 మ్యూజిక్‌ విషయానికి వస్తే.. సిద్ధార్థ్‌ మల్హోత్రా, కత్రినా కైఫ్‌ నటించిన ‘కాలా చష్మా’ వీడియో 45 మిలియన్ల వ్యూస్‌తో టాప్‌లో ఉందని తెలిపింది.

టాప్‌ 10 వీడియోలను మొత్తం కలిపి 70 మిలియన్ల మంది చూశారని, దీని వల్ల యూట్యూబ్‌ ఛానెల్‌ను 45 మిలియన్ల మంది అదనంగా సబ్‌స్క్రైబ్‌ చేసుకున్నారని యూట్యూబ్‌ భాగస్వామి సత్య రాఘవన్‌ వివరించారు.