‘సోషల్’ పైత్యం.. కైకాల మరణించారంటూ ప్రచారం

జనాలకి సోషల్ మీడియా పైత్యం బాగా ఎక్కువైపోతోంది. బతికున్నవాళ్లనే చనిపోయారంటూ ప్రచారం చేసేస్తున్నారు. అసలు చనిపోయింది ఎవరు, ఫలానా వ్యక్తి నిజంగా కన్నుమూశారా లేదా? అనే విషయాన్ని ఖరారు చేసుకోకుండా సోషల్ మీడియాలో ప్రచారం చేసేస్తున్నారు. ఈ పైత్య ప్రచారానికి ప్రముఖ సీనియర్ నటుడు, నవరస నటసార్వభౌమ కైకాల సత్యనారాయణ బలైపోయారు. వయసు మళ్లిన సినీ తారలను సోషల్ మీడియాలో చనిపోయారంటూ ప్రచారం చేయడం ఈ మధ్య బాగా అలవాటైపోయింది. ఇలాంటి ప్రచారాలు జరుగుతున్నప్పుడు ‘మేం బతికే ఉన్నాం మొర్రో’ అంటూ ఆ సెలబ్రిటీలు తల బాదుకోవాల్సిన పరిస్థితి వస్తోంది.

వాస్తవానికి సీనియర్ నటుడు వంకాయల సత్యనారాయణ సోమవారం కన్నుమూశారు. ఈయన పేరులో సత్యనారాయణ ఉండటంతో సదరు సోషల్ మీడియా దిగ్గజ యూజర్ కైకాల సత్యనారాయణ అనుకున్నారు. కైకాల ఫొటోను సోషల్ మీడియాలో పెట్టేసి సంతాపం ప్రకటించేశారు. మిగిలిన వారు ఊరుకుంటారా.. ఏది నిజమో, ఏది అబద్ధమో తెలుసుకోకుండా దాన్ని షేర్ చేయడం మొదలుపెట్టారు. ఫేస్‌బుక్, ట్విట్టర్, వాట్సాప్ ఇలా అన్నిటిలోనూ ఈ వార్త వైరల్ అయిపోయింది. వయసుపైబడినప్పటికీ ఆరోగ్యంగా ఉన్న గొప్ప నటుడుపై ఇలాంటి రూమర్లు రావడంతో మూవీ ఆర్టిస్ట్స్ అసోసియేషన్ (మా) ఉలిక్కిపడింది. వెంటనే ఒక ప్రకటనను విడుదల చేసింది.

కైకాల సత్యనారాయణ ఆరోగ్యంగా, క్షేమంగా ఉన్నారని ప్రకటనలో తెలిపింది. దయచేసి ఇలాంటి పుకార్లను నమొద్దని ప్రజలను కోరింది. గ‌తంలో ల‌య‌, వేణుమాధ‌వ్‌, కోట శ్రీనివాస‌రావు, చంద్రమోహ‌న్, ఎం.ఎస్.నారాయణ(చనిపోవడానికి ముందు)లపై కూడా ఇలాంటి పుకార్లే వచ్చాయి.