రూ. 5 కోట్ల ఆఫర్స్‌కి నో చెప్పిన కాజల్ అగర్వాల్

కాజల్ అగర్వాల్ ఎక్కువ పారితోషికం డిమాండ్ చేస్తూ ఆమధ్య కొన్ని పెద్ద సినిమాలు వదులుకుంది అని అన్నారు. కానీ అధిక పారితోషికం ఇస్తామన్నా ఆమె కాదన్న సినిమాలు కూడా కొన్ని వున్నాయంటున్నాయి సినీవర్గాలు. నేనే రాజు నేనే మంత్రి సినిమాలో రాధ పాత్రలో ఆకట్టుకున్న కాజల్ అగర్వాల్ త్వరలోనే తమిళంలో క్వీన్ రీమేక్‌లో నటించనున్నట్టు ప్రముఖ ట్రేడ్ ఎనలిస్ట్ బాల స్పష్టంచేశారు. ప్రస్తుతం స్థానిక పరిస్థితులు, సంస్కృతి, సంప్రదాయాలకి అనుగుణంగా ఈ సినిమా స్టోరీని మలిచే ప్రయత్నం జరుగుతోంది.

బాలీవుడ్‌లో విమర్శకుల ప్రశంసలు అందుకున్న క్వీన్ సినిమాలో కంగనా రనౌత్ ఓ బోల్డ్ బ్యూటీగా నటించింది. అయితే, అంత బోల్డ్ బ్యూటీ పాత్రని పోషించడానికి ఏమాత్రం వెనుకాడకుండా ఓకే చెప్పిన కాజల్ అగర్వాల్ అంతకన్నా ముందుగా మహిళా ప్రాధాన్యత కలిగిన రెండు సినిమాలకు నో చెప్పిందట. అందులో ఒకటి ప్రముఖ దర్శకుడు పీ వాసు చిత్రం కాగా మరొకట బాలీవుడ్ సినిమానట.

ఈ రెండు చిత్రాలకి కాజల్ సైన్ చేసి వుంటే, ఆమెకి రూ.5 కోట్ల పారితోషికం సొంతమయ్యేదే. కానీ అప్పుడెందుకో మహిళా ప్రాధాన్యత కలిగిన చిత్రాలు చేస్తున్న హీరోయిన్‌గా పిలిపించుకోవడం ఆమెకి అస్సలు ఇష్టం లేదట. అందుకే అప్పుడు ఆ చిత్రాలకి నో చెప్పిందట కాజల్.