అబ్బాయ్ తర్వాత బాబాయ్‌తో కాజల్ రొమాన్స్!

ముందుగా యంగ్ హీరోలతో నటించడం ఆపై వెటరన్స్ తో జతకట్టడం.. కాజల్ కు ఇది కొత్తేం కాదు. ఇది వరకూ రామ్ చరణ్ తేజ సరసన కొన్ని సినిమాల్లో హీరోయిన్ గా నటించిన కాజల్ ఆపై చరణ్ తండ్రి మెగాస్టార్ చిరంజీవితో జతకట్టింది. చరణ్ తో ‘మగధీర’ ‘నాయక్’ వంటి హిట్ సినిమాల్లో నటించిన కాజల్ చిరుతో జతకట్టి ‘ఖైదీ 150’తో సూపర్ హిట్ ను సొంతం చేసుకుంది. మళ్లీ ఫామ్ లోకి వచ్చింది.

ఈ నేపథ్యంలో కాజల్ కు అవకాశాలు బాగానే ఉన్నాయి. ఆ పరంపరలోనే ఇటీవల ‘నేనే రాజు నేనే మంత్రి’ సినిమాతో ఈమె హిట్టు కొట్టింది. అందులో రానా సరసన హీరోయిన్ గా నటించింది కాజల్. తేజ దర్శకత్వంలో రూపొందిన ఆ సినిమా హిట్టుగా నిలిచింది. ఈ నేపథ్యంలో ఇప్పుడు ఈ భామకు మరో అవకాశం వరించినట్టు సమాచారం. తేజ దర్శకత్వంలోనే వెంకటేష్ హీరోగా రానున్న సినిమాలో కాజల్ హీరోయిన్ గా నటించనున్నదని తెలుస్తోంది.

ఈ విధంగా ముందుగా అబ్బాయ్ రానా సరసన హీరోయిన్ గా నటించిన కాజల్ ఇప్పుడు బాబాయ్ వెంకటేష్ సరసన నటిస్తోంది. తండ్రీ కొడుకులతో నటించే పరంపరను కొనసాగిస్తోంది. అలాగే తేజ దర్శకత్వంలో కాజల్ కు ఇది మూడో సినిమా అవుతుంది. తేజ డైరెక్షన్లో వచ్చిన ‘లక్ష్మీకల్యాణం’ సినిమాతో కెరీర్ ను ఆరంభించిన కాజల్ ఇప్పుడు ఆ దర్శకుడితో వరసగా సినిమాలు చేస్తోంది.