నాగార్జున కోసం దర్శకుడి తిప్పలు!

‘సోగ్గాడే చిన్ని నాయనా’ చిత్రంతో నాగార్జునకు ఓ సూపర్ హిట్ అందించారు దర్శకుడు కల్యాణ్ కృష్ణ. ఆ తరవాత ఈయనతో ‘బంగార్రాజు’ అనే సినిమా చేయాలనుకున్నారు నాగార్జున. అయితే ఈలోగా తనకొడుకు నాగచైతన్యను హీరోగా పెట్టి కల్యాణ్ కృష్ణతో ‘రా రండోయ్ వేడుక చూద్దాం’ సినిమాను నిర్మించారు. ఈ సినిమా తరువాత నాగార్జునతో కల్యాణ్ కృష్ణ చిత్రం ఉంటుందని అందరూ అనుకున్నారు. అన్నపూర్ణ స్టూడియోస్‌లో వరుసగా మూడో సినిమా చేయబోతున్నాడని, కల్యాణ్ కృష్ణ అదృష్టవంతుడని అన్నారు.

అయితే ఇప్పుడు నాగార్జున మాత్రం అసలు ‘బంగార్రాజు’ మాటే ఎత్తడం లేదట. ఇప్పటికే కల్యాణ్ కృష్ణ స్టోరీ లైన్ సిద్ధం చేసి వినిపించడానికి రెడీగా ఉన్నా.. నాగ్ మాత్రం వినడానికి ఆసక్తి చూపడం లేదు. పైగా బయట మరొక సినిమా చేసుకొని రా.. అని కల్యాణ్‌కు సూచించారట. వాస్తవానికి చైతుతో సినిమా కంటే నాగార్జునతో సినిమా చేయడానికే కల్యాణ్ కృష్ణ ఎక్కువగా ఆసక్తి చూపించారు. కానీ నాగార్జున.. చైతుతో సినిమా చేయమని అడిగేసరికి కాదనలేక ‘రా రండోయ్..’ చేశారు.

ఈ సినిమాకు సంబంధించిన చాలా విషయాల్లో నాగార్జున ఇన్వాల్వ్ అయ్యారు. సినిమాలో చాలా సన్నివేశాలు ఆయన ఇష్టం మేరకే మార్చారు. అయితే రిజల్ట్ మాత్రం అంతంత మాత్రంగానే వచ్చింది. దీంతో నాగ్ ‘బంగార్రాజు’ సినిమా విషయంలో పునరాలోచనలో పడ్డారు. కానీ నాగార్జునతో ఎలాగైనా.. ఈ సినిమా చేయాలని నానాతంటాలు పడుతున్నారు కల్యాణ్ కృష్ణ. మరి దీనికి ఆయన అంగీకరిస్తారో.. లేదో.. చూడాలి!