కళ్యాణ్ రామ్‌ని వెయిటింగ్‌లో పెట్టిన కాజల్ అగర్వాల్

తనని టాలీవుడ్‌కి పరిచయం చేసిన లక్ష్మీ కళ్యాణం సినిమాలో తనతో కలిసి నటించిన హీరోని ఇప్పుడు వెయిటింగ్‌లో పెట్టింది కాజల్ అగర్వాల్. పదేళ్ల తర్వాత కళ్యాణ్ రామ్, కాజల్ అగర్వాల్ మళ్లీ జంటగా కలిసి నటిస్తున్న సినిమా ఎంఎల్‌ఏ. ఉపేంద్ర మాధవ్ అనే కొత్త దర్శకుడు డైరెక్ట్ చేస్తోన్న ఈ సినిమాకు కాజల్ అగర్వాల్ సైన్ చేసిన సమయంలో ఆమె చేతిలో పెద్దగా సినిమాలేవీ లేవు. కానీ ఎంఎల్‌ఏ సినిమాకు సైన్ చేసిన తర్వాత అనుకోకుండా కాజల్ క్వీన్ సినిమా రీమేక్‌తో బిజీ అయిపోయింది.

బాలీవుడ్‌లో విమర్శకుల ప్రశంసలు అందుకున్న సూపర్ హిట్ సినిమా క్వీన్‌కి ఇది తమిళ రీమేక్ వెర్షన్. రమేష్ అరవింద్ డైరెక్ట్ చేస్తున్న ఈ రీమేక్ కోసం ప్రస్తుతం ప్యారిస్‌లో జరుగుతున్న షూటింగ్‌తో కాజల్ బిజీగా వుంది. ఇదిలావుంటే, ఎంఎల్‌ఏ సినిమా తర్వాతి షెడ్యూల్ షూట్ కోసం రెడీగా వున్న కళ్యాణ్ రామ్ ఇక్కడ ఇండియాలో ఆమె కోసం వేచిచూడక తప్పడం లేదని తెలుస్తోంది.

సినీవర్గాలు చెబుతున్న సమాచారం ప్రకారం కళ్యాణ్ రామ్ ఆమె రాక కోసం కాస్త ఆత్రుతగానే ఎదురుచూస్తున్నాడని టాక్. కాజల్ అగర్వాల్ ఎప్పుడు ఇండియాకు వచ్చేనో... ఎప్పుడు ఎంఎల్‌ఏ షూట్‌లో జాయిన్ అవుతుందో తెలియదు కానీ అప్పటివరకు కళ్యాణ్ రామ్‌కి వెయిటింగ్ తప్పేలా లేదంటున్నాయి టాలీవుడ్ వర్గాలు.