​కల్యాణ్ రామ్ ను భార్య కోరిన కోరికేమిటంటే...!

ఈ ఏడాది సంక్రాంతి సమయంలో విడుదలై.. విజయవంతమై.. తాజాగా అత్యంత ప్రజాదరణ పొందిన చిత్రంగా జాతీయ అవార్డును అందుకున్న ‘శతమానం భవతి’ సినిమా రూపకర్తలను ప్రముఖ నిర్మాత అల్లు అరవింద్ ప్రత్యేకంగా సత్కరించారు. అరుదుగా మాత్రమే తెలుగు సినిమాల పేర్లు జాతీయ అవార్డుల విషయంలో వినిపిస్తూ ఉంటాయి. ఈ నేపథ్యంలో అలాంటి ఘనతను సాధించినందుకు అల్లు అరవింద్ నిర్మాత దిల్ రాజు, దర్శకుడు వేగేశ్న, హీరో శర్వానంద్ లను సత్కరించారు.

ఈ కార్యక్రమానికి మెగాస్టార్ చిరంజీవితో సహా చిత్ర రంగ ప్రముఖులు హాజరయ్యారు. కల్యాణ్ రామ్, అల్లు అర్జున్, నాని తదితరులు పాల్గొన్నారు. ఈ కార్యక్రమంలో కల్యాణ్ రామ్ మాట్లాడుతూ ఒక ఆసక్తికరమైన విషయాన్ని చెప్పారు. శతమానం భవతి సినిమాను అభినందిస్తూ.. తన భార్య తనతో అన్నమాటను ఆయన వివరించారు.

‘అప్పుడప్పుడు ఇలాంటి సినిమాలు కూడా చేయొచ్చుగా...’ అని తన భార్య అందని కల్యాణ్ రామ్ తెలిపారు. తను ఎక్కువగా మాస్ ఎంటర్ టైనర్లను చేస్తాననే విషయాన్ని ఉదాహరిస్తూ కల్యాణ్ రామ్ ఈ విషయాన్ని తెలిపారు. శతమానం భవతి సినిమాను చూడగానే తన భార్య ఆ మాట అందని.. ఆమె కోరిక మేరకు తను కూడా చక్కటి ఫ్యామిలీ ఎంటర్ టైనర్ ను చేస్తానని కల్యాణ్ రామ్ అన్నారు.