Vikram మూవీ మేకింగ్ వీడియో.. పవర్‌ఫుల్‌ సీన్స్ ఇలా తీశారు

యూనివ‌ర్సల్ యాక్టర్ క‌మ‌ల్ హాస‌న్ (Kamal Haasan), స్టార్ డైరెక్టర్ లోకేష్ క‌న‌క‌రాజ్ (Lokesh Kanagaraj) కాంబినేషన్‌లో లేటెస్ట్ మూవీ విక్రమ్ (Vikram). ఈ సినిమా విడుదలైన అన్ని భాషల్లో సెన్సేషనల్ బ్లాక్ బస్టర్‌గా నిలిచింది. దాదాపు రూ.400 కోట్లకు పైగా వసూళ్లను రాబట్టి.. క‌మ‌ల్ హాస‌న్ కెరీర్‌లోనే బిగ్గెస్ట్ హిట్‌గా నిలిచింది. విల‌క్షణ న‌టుడు విజ‌య్ సేతుప‌తి (Vijay Sethupathi), మ‌ల‌యాళ స్టార్ ఫ‌హాద్ ఫాజిల్ (Fahadh Faasil) కీ రోల్స్ ప్లే చేయగా.. మూవీ క్లైమాక్స్‌లో వెర్సటైల్ హీరో సూర్య (Suriya) అతిథి పాత్రలో మెప్పించాడు. ముఖ్యంగా ఇందులోని యాక్షన్ సీన్స్ ఆడియన్స్‌కు బాగా కనెక్ట్ అయ్యాయి.

తాజాగా ఈ సినిమా మేకింగ్ వీడియోను డిస్నీ ప్లస్‌ హాట్‌స్టార్‌ రిలీజ్ చేసింది. ఫహాద్‌ ఫాజిల్‌‌పై షాట్‌తో మేకింగ్ వీడియోను స్టార్ట్ చేశారు. కమల్ హాసన్ ఫైట్ సీన్స్, జైలు సన్నివేశాలు చూపించారు. షూటింగ్ సమయంలో లోకేశ్‌ కనగరాజ్ డేడికేషన్ చూడొచ్చు. భారీ సెట్టింగ్స్ మధ్య సీన్లను ఎలా షూట్ చేశారో చూపించారు.

ప్రస్తుతం ఈ వీడియో నెట్టంట తెగ వైరల్ అవుతోంది. డైరెక్టర్ లోకేష్ క‌న‌క‌రాజ్‌పై ప్రశంసల వర్షం కురిపిస్తున్నారు. విక్రమ్ సినిమా ప్రస్తుతం డిస్నీ ప్లస్ హాట్ స్టార్‌లో స్ట్రీమింగ్ అవుతోంది. లోకేష్ క‌న‌క‌రాజ్‌ తన తరువాత సినిమా విజ‌య్‌తో చేయనున్నాడు. ఇప్పటికే వీరిద్దరి కాంబినేషన్‌లో వచ్చిన మాస్టర్ సినిమా ఘ‌న విజ‌యం సాధించింది.