సల్మాన్‌తో కమల్.. ఇద్దరు ‘బిగ్‌బాస్’లు ఒకే చోట!

బాలీవుడ్ హీరో సల్మాన్ ఖాన్, విశ్వనాయకుడు కమలహాసన్.. ఇద్దరూ బిగ్‌బాస్‌లే. ఒకరు ఇప్పటికే హిందీ ‘బిగ్‌బాస్‌’లో ప్రేక్షకులను అలరిస్తున్నారు. ఇంకొకరు తమిళ ‘బిగ్‌బాస్‌’గా రెండో సీజన్లో అడుగుపెట్టారు. వీరిద్దరూ కలిశారంటే ఏదో విశేషం ఉండే ఉంటుంది. సల్మాన్‌తో కలిసి కమల్ సినిమా చేస్తున్నారనుకుంటే పొరపాటే.

వీరిద్దరు కలవడం వెనుక ఒక విశేషం ఉంది. అదే.. ‘విశ్వరూపం 2’ సినిమా విడుదల. 2013లో విడుదలైన ‘విశ్వరూపం’ సీక్వెల్‌గా విడుదలవుతున్న ‘విశ్వరూపం 2’ ప్రమోషన్ కోసం కమల్ సల్మాన్‌ను కలిశారు. హిందీలోని ఓ టీవీ చానెల్‌లో ప్రసారమయ్యే ‘దస్ కా దమ్’ రియాలిటీ గేమ్‌షోకు సల్మాన్ హోస్ట్‌గా వ్యవహరిస్తున్నారు.

ఈ కార్యక్రమంలో పాల్గొన్న కమల్.. సల్మాన్‌తో తీసుకున్న ఫొటోను ‘ఇన్‌స్టాగ్రమ్’లో పోస్ట్ చేశారు. ‘‘భాయ్ అంటే ఇలా ఉండాలి. చాలా రోజుల తర్వాత నిన్ను కలిసినందుకు ఆనందంగా ఉంది’’ అని కమల్ పేర్కొన్నారు. ‘విశ్వరూపం 2’ సినిమా ఆగస్టు 10న విడుదల కానుంది.