‘గొర్రె’కామెంట్: ‘బాహుబలి’పై కమల్ హాట్

బాహుబలి 2 మూవీ కుండపోత రికార్డులకు బాక్సాఫీస్ రికార్డులు షేక్ అవుతూనే ఉన్నాయి. విడుదలైన తొలి రోజు 100 కోట్లు, తొలివారం 1000 కోట్లు, మూడో వారం వచ్చేసరికి 1500 కోట్లు ఇలా ప్రపంచ వ్యాప్తంగా తిరుగులేని రికార్డ్స్‌ని తన ఖాతాలో వేసుకుని ప్రపంచాన్ని తనవైపు తిప్పుకుని ‘సాహో రే బాహుబలి’అనేట్టు చేసింది.

అయితే బాహుబలి మూవీ విడులైనప్పటినుండి ప్రముఖుల ప్రశంసలను అందుకుంటూనే ఉంది. తాజాగా బాలీవుడ్ హీరోలు సైతం బాహుబలిని మట్టిలో మాణిక్యం అంటూ పొగడ్తలతో ముంచెత్తారు.

ఈ పొగడ్తల సంగతి పక్కన పెడితే.. బాహుబలి 2 మూవీలో కొన్ని లోపాలు ఉన్నప్పటికీ వేలెత్తి చూపింది ఎవరూ లేరు. అయితే విశ్వ నటుడు కమల్ హాసన్ పొగడ్తలను పక్కన పెట్టేసి పూర్తి భిన్నంగా స్పందించారు. ప్రపంచ వ్యాప్తంగా రికార్డుల మోత మోగించిన బాహుబలిని విమర్శించేందుకు ఏ మాత్రం సంకోచించకుండా తనదైన శైలిలో స్పందించారు.

ఇటీవల మీరు బాహుబలి వంటి మూవీ ఎప్పుడు చేస్తారని మీడియా అడిగిన ప్రశ్నకు సమాధానంగా ‘నేనేమైనా గొర్రెనా.. బాహుబలి లాంటి సినిమా చేయడానికి.. కనీసం గొర్రెల కాపరిని కూడా కాదు. నేను వేరే జాతి జంతువుని, ఏదో సినిమా హిట్ అయినంతమాత్రాన అలాంటి సినిమానే నేనూ చేయాలనే టైప్ కాదు’ అంటూ గొర్రె సామెత చెబుతూ బాహుబలిపై గుర్రాయ్యారు కమల్.

అయితే కమల్ కామెంట్స్‌‌పై చాలా మంది నెటిజన్లు పాజిటివ్‌గా స్పందిస్తున్నారు. ఆయన చెప్పింది నిజమే కాదా అందరూ బాహుబలి లాంటి సినిమా అంటే ఎలా కుదురుతుంది. అయినా కమల్ తలుచుకుంటే అంతకంటే మంచి నటనతో కూడిన చిత్రాన్ని తీసే సత్తా ఆయనలో ఉందనటానికి ఆయన గత చిత్రాలను ఉదాహరణగా చూపుతున్నారు.

గ్రాఫిక్స్‌తో కాకుండా తనలోని నటనను దశావతారాలలో చూపించే కమల్ బాహుబలిపై మరీ ఇంత కటువుగా సమధానం ఇవ్వాలా అంటూ బాహుబలి ఫ్యాన్స్ ఈ ‘గొర్రె కామెంట్స్‌’పై గుర్రుగా ఉన్నారు.