కొత్త పార్టీ పెడుతున్నా.. స్పష్టం చేసిన హీరో!

తను కొత్త పార్టీ పెట్టబోతున్నానని స్పష్టం చేశాడు నటుడు కమల్ హాసన్. ఈ మేరకు తాజాగా కమల్ ఒక ఇంటర్వ్యూలో ప్రకటించారు. తను రాజకీయాల్లోకి వచ్చినట్టే అని ఇటీవల ప్రకటించిన ఈ హీరో.. ఇప్పుడు తను కొత్త పార్టీ పెట్టబోతున్నట్టుగా స్పష్టం చేశాడు. తను మరే పార్టీలోనూ చేరడం లేదని.. కొత్త పార్టీతోనే ప్రజల ముందుకు వస్తానని కమల్ వ్యాఖ్యానించాడు.

ఇటీవల కేరళ సీఎం పినరాయి విజయన్ తో కమల్ సమావేశం అయ్యాడు. దీంతో ఆయన సీపీఎంలోకి చేరవచ్చనే మాట వినిపించింది. అయితే తనకు సరితూగే పార్టీలేవీ లేవని కమల్ వ్యాఖ్యానించడం గమనార్హం. ‘నాకు సరితూగే పార్టీలు ఏవైనా ఉన్నాయా?’ అని ప్రశ్నించిన కమల్, అలాంటివి లేవని తనే సమాధానం ఇచ్చాడు. కొత్త పార్టీ పెట్టే ప్రజల మధ్యకు వెళ్తానని వ్యాఖ్యానించాడు.

తను ప్రజల బలవంతం మీదే రాజకీయాల్లోకి వస్తున్నాను అని కమల్ వ్యాఖ్యానించడం గమనార్హం. తన ఇష్ట ప్రకారం కాదు, ప్రజల ఒత్తిడి మేరకే రాజకీయాల్లోకి వస్తున్నానని కమల్ చెప్పుకొచ్చాడు. తమిళనాడు రాజకీయాలపై స్పందిస్తూ.. అన్నాడీఎంకే నుంచి శశికళను సస్పెండ్ చేయడం స్వాగతించాల్సిన పరిణామం అని ఈ హీరో అభిప్రాయపడ్డాడు. సెప్టెంబర్ నెల ఆఖరులోగానే కొత్త పార్టీకి సంబంధించి కమల్ పూర్తి వివరాలను ప్రకటిస్తాడని సమాచారం.