రజనీతో కలిసి నటించాలనుంది కానీ...

తమిళనాడులో జల్లికట్టు కోసం జరుగుతున్న ఆందోళనలు, విధ్వంసం గురించి మీడియాతో మాట్లాడుతూ... పనిలో పనిగా తన మనసులో మాటను కూడా బయటపెట్టారు కమల్ హాసన్. తన సన్నిహిత మిత్రుడు, తమిళ సూపర్ స్టార్ రజినీకాంత్‌తో కలిసి నటించాలనుంది అని తన కోరికను వెల్లడించిన కమల్... తమ కోసం అంత బడ్జెట్ వెచ్చించే నిర్మాత ఎవరు అని సందేహాలు వ్యక్తంచేశారు. ఒకవేళ అటువంటి కథతో ఎవరైనా నిర్మాత ముందుకొస్తే, రజినీతో కలిసి నటించడానికి తాను సిద్ధంగా ఉన్నానని తెలిపారు.

1970 నుంచి 1985 మధ్య కాలంలో ఈ ఇద్దరి కాంబినేషన్‌లో దాదాపు 10-11 సినిమాలు వచ్చాయి. అందులో ఎక్కువగా ఏవీఎం ప్రొడక్షన్ హౌజ్ నిర్మించినవే. ఆకలి రాజ్యం లాంటి చిత్రాలు ఎప్పటికీ మరిచిపోలేని చిత్రాలుగా నిలిచిపోయాయి. 2012లోనూ ఓసారి వీళ్లిద్దరి కాంబినేషన్‌లో సినిమాపై చర్చ జరిగింది. ఏవీఎం ప్రొడక్షన్స్ అధినేత శరవణన్ మరోసారి వీళ్లిద్దరితో కలిసి సినిమా తీసేందుకు రెడీ అయ్యారు. అయితే, ఆ సినిమాకు ప్రముఖ డైరెక్టర్ కే బాలచందరే డైరెక్ట్ చేయాలి అని ఆశించారు శరవణన్. కానీ శరవణన్ కోరిక తీరకుండానే బాలచందర్ మృతిచెందారు.

ఇక ఇప్పుడు వీళ్లిద్దరూ కలిసి సినిమా తీస్తామంటే, ఆ చిత్రాన్ని నిర్మించే బడా నిర్మాణ సంస్థలెన్నో తమిళనాట ఉన్నాయి. అంతేకాకుండా బాలీవుడ్ నిర్మాణ సంస్థలు కూడా సౌతిండియా సినిమాలు నిర్మిస్తున్న రోజులివి. కానీ ఈ ఇద్దరు లెజెండ్లను సింగిల్ ఫ్రేమ్‌లో అంత పర్‌ఫెక్ట్ గా బంధించే దర్శకుడు ఎవరు అనేదే ఇప్పుడు ఓ అంతుచిక్కని ప్రశ్న.