కమల్ సూపర్ హిట్ కు సీక్వెల్ వచ్చేస్తోంది..!

‘విశ్వరూపం’ ఈ సినిమా ఎంత వివాదం అయ్యిందో.. అంతే స్థాయి హిట్ కూడా అయ్యింది. విడుదలకు ముందు ప్రతిష్టంభనతో కమల్ కు భారీ నష్టాలను తీసుకొచ్చిన ఈ సినిమా విడుదల తర్వాత భారీ స్థాయిలో కలెక్షన్లను కూడా సంపాదించింది పెట్టింది. దాదాపు రెండు వందల కోట్ల రూపాయల వసూళ్లకు దక్కాయి విశ్వరూపం సినిమాకు. అదే సమయంలో విశ్వరూపం కు సీక్వెల్ ను కూడా అనౌన్స్ చేశారు కమల్. షూటింగ్ పార్టును అప్పట్లోనే పూర్తి చేశారు కూడా. అయితే విడుదల మాత్రం ఆగిపోయింది.

కమల్ కు , ఆ సినిమా నిర్మాతకు విబేధాల నడుమ ఆ సినిమా ఆగిపోయింది. కమల్ కూడా అందుకు సంబంధించిన వివరణ ఇచ్చాడు. ఆ ప్రాజెక్టు అలా ఆగిపోయిందని అనుకుంటే.. ఈ మధ్యనే కమల్ దాని విడుదలపై స్పందించారు. త్వరలోనే ఆ సినిమాను ప్రేక్షకుల ముందుకు తీసుకొస్తానని కమల్ ప్రకటించారు. స్వీయదర్శకత్వంలో రూపొందిన ఆ సినిమా గురించి కమల్ ఆ అనౌన్స్ మెంట్ చేసిన కొన్ని రోజుల్లోనే ఇప్పుడు ఈ సినిమాకు సంబంధించిన అప్ డేట్స్ వస్తున్నాయి.

ఈ సినిమాకు పోస్ట్ ప్రొడక్షన్ వర్క్స్ ప్రారంభం అయినట్టుగా తెలుస్తోంది. ఈ మేరకు సంగీత దర్శకు గిబ్రాన్ ట్వీట్ చేశాడు. విశ్వరూపం-2 కు సంబంధించి బీజీఎమ్ పని చేస్తున్నట్టుగా గిబ్రాన్ ప్రకటించాడు. మొత్తానికి కమల్ అభిమానులు ఎంతగానో వేచి చూస్తున్న విశ్వరూపం ద్వితీయ భాగం త్వరలోనే విడుదలకు నోచుకునేలా ఉంది.