ఇలా అయితే బిగ్‌బాస్ షో వదిలేస్తా!

‘ఇలా అయితే బిగ్‌బాస్ షో వదిలేస్తా..’ అని హెచ్చరించాడు కమల్ హాసన్. తమిళ బిగ్‌బాస్ కు హోస్టుగా వ్యవహరిస్తున్న కమల్ కు నిర్వాహకుల, కార్యక్రమంలో పాల్గొంటున్న వారి పట్ల తీవ్రమైన ఆగ్రహం వచ్చింది. దీంతో ఆయన షో ను వదులుకోవడానికి వెనుకాడను అని హెచ్చరించారు. మరి ఇప్పటికే తీవ్ర వివాదాస్పదంగా మారిన తమిళ బిగ్‌బాస్ లో కమల్ కు ఎందుకు కోపం వచ్చింది? అంటే.. దానికి కారణం ఉంది.

బిగ్‌బాస్‌లో డే టూ డే యాక్టివిటీస్ లో భాగంగా పాల్గొంటున్న వాళ్లు ఏదో ఒక రోల్ ప్లే ద్వారా ఫన్ పండించాల్సి ఉంటుంది. మరి దీని కోసం హౌస్ లోని వ్యక్తులు మతిస్థిమితం లేని వ్యక్తుల్లా నటించడం గట్రా చేశారు. దీని పై కమల్ ఫైర్ అయ్యాడు. దివ్యాంగులనో, మతిస్థిమితం లేని వ్యక్తులనో అనుకరిస్తూ కామెడీ చేయడం తగదని కమల్ స్పష్టం చేశాడు. కొంచెమైన సోషల్ రెస్పాన్సిబులిటీ ఉండాలని అలాంటి చర్యలు తగవని వ్యాఖ్యానించాడు. ఇకపై అలాంటి చర్యలను రిపీట్ చేస్తే బిగ్‌బాస్ షోను వదులుకోవడానికి తను వెనుకాడను అని కమల్ స్పష్టం చేశారు.

తను తన సినిమాల్లో దివ్యాంగుడిగా, మతిస్థిమితం సరిలేని వ్యక్తిగా నటించిన విషయాన్ని కూడా కమల్ ప్రస్తావించాడు. అయితే అందుల్లో తను నవ్వుకోవడానికి ఆ పాత్రలు చేయలేదని, ఆ పాత్రలే హీరోలని.. కమల్ గుర్తు చేశాడు. దివ్యాంగులను కించపరిచే చర్యలను తను ఏ మాత్రం సమర్థించనని కమల్ స్పష్టం చేశాడు.