షూటింగ్‌లో తీవ్రంగా గాయపడిన కంగనా రనౌత్!

బాలీవుడ్ నటి కంగనా రనౌత్ ఓ కత్తి సాము సన్నివేశాన్ని తెరకెక్కించడం కోసం జరుగుతున్న షూటింగ్‌లో తీవ్రంగా గాయపడ్డారు. టాలీవుడ్ డైరెక్టర్ క్రిష్ తెరకెక్కిస్తున్న బాలీవుడ్ మూవీ మణికర్ణిక షూటింగ్‌లో ఈ ప్రమాదం చోటుచేసుకుంది. తన సహ నటుడు నిహార్ పాండ్యతో కలిసి కత్తి సాము సన్నివేశానికి సంబంధించిన షూటింగ్‌లో పాల్గొంటుండగా కంగనా టైమింగ్ మిస్ అవడంతో నిహార్ పాండ్య కత్తి కంగనా నుదుటికి తగిలింది. దీంతో నుదుటిపై తీవ్రగాయమైన కంగనాని ఆస్పత్రికి తరలించారు.

కంగనాకి చికిత్స చేసిన డాక్టర్లు నుదుటిపై గాయానికి 15 కుట్లు వేశారు. తృటిలో ప్రమాదం తప్పిందని.. లేదంటే ఆమె ఎముకకి చాలా తీవ్రగాయమైన గాయం అయ్యుండేది అని తెలిపారు డాక్టర్లు. ఈ ఘటనపై స్పందించిన నిర్మాత కమల్ జైన్.. ఈ సన్నివేశాన్ని ఇప్పటికే చాలాసార్లు రిహార్సల్స్ చేశారని, డూప్‌ని పెట్టుకోవాల్సిందిగా సూచించినప్పటికీ, కంగనా రిస్క్ చేసి మరీ ఈ కత్తిసాము చేసిందని అన్నారు. కంగనాకి గాయమవడానికి తానే కారణం అని భావించిన నిహార్ సైతం ఆమెకి క్షమాపణలు చెప్పుకున్నాడు.