కెనడాలో గుండెపోటుతో మృతిచెందిన భారతీయ నటుడు

శాండిల్‌వుడ్‌కు చెందిన సీనియర్ నటుడు కెనడాలో గుండెపోటుతో మరణించాడు. దీంతో కన్నడ సినీ పరిశ్రమలో విషాదం చోటు చేసుకుంది. కెనడాలోని ఒట్టావాలో కుటుంబంతో కలిసి నివశిస్తోన్న నటుడు ఈడకల్లు చంద్రశేఖర్ శనివారం గుండెపోటుతో మరణించారు. ఈ విషయాన్ని ఆయన కుమార్తె తాన్య వెల్లడించారు. 1969లో వచ్చిన నమ్మ మక్కలు చిత్రంతో బాల నటుడిగా పరిచయైన ఆయన 'ఈడకల్లు గుడ్డడ మేలే' సినిమా ఘన విజయం సాధించడంతో దానినే తన ఇంటి పేరుగా మార్చుకున్నారు. 'సంపంతిగె సవాల్', 'హంసగీతె', 'రాజా నన్న రాజా' లాంటి విజయవంతమైన చిత్రాల్లో నటించిన ఆయన, 'పూర్వపర' అనే సినిమాకు నిర్మాతగానూ వ్యవహరించారు. దాదాపు 40 సినిమాల్లో నటించిన ఆయన ఆఖరి చిత్రం '3 గంటె 3 దిన 30 సెకండ్' విడుదల కానుంది. ఇటీవలే ఆయన నటించిన రాజు కన్నడ మీడియం సినిమా విడుదలైంది.

కెనడాలోని భారత రాయబార కార్యాలయంలోనూ ఈయన పని చేశారు. డ్యాన్సర్ షీలాను 1984లో వివాహం చేసుకున్న ఆయన అనంతరం కుటుంబంతో కలిసి కెనడా వెళ్లిపోయారు. మళ్లీ 2004లో ఇండియాకు తిరిగొచ్చిన ఆయన పూర్వపర అనే చిత్రానికి దర్శకత్వం వహించి నటించారు. ఇందులో ప్రముఖ నటి గీత ఓ ప్రధాన పాత్రను పోషించారు. చంద్రశేఖర్ మృతి పట్ల కన్నడ చిత్ర పరిశ్రమ ప్రముఖులు సంతాపం తెలిపారు. ఆయన మృతిపై కర్ణాటక ముఖ్యమంత్రి సిద్ధరామయ్య, బీజేపీ రాష్ట్ర అధ్యక్షుడు యడ్యూరప్ప తమ సంతాపం తెలియజేశారు.