కరీనాకు రాహుల్‌ అంటే ఒకప్పుడు తెగ క్రష్ అట!

బాలీవుడ్ బ్యూటీ కరీనా కపూర్‌కు కాంగ్రెస్‌ అధ్యక్షుడు, యువనేత రాహుల్‌ గాంధీ అంటే ఒకప్పుడు తెగ ఇష్టమట. 2002లో ఓ ఇంటర్వ్యూ సందర్భంగా కరీనా ఈ విషయం తెలిపింది. ముంబైలో జరుగుతున్న లాక్మే ఫ్యాషన్‌ షో నేపథ్యంలో ఈ అంశం సోషల్‌ మీడియాలో మరోసారి వైరల్‌‌గా మారింది.

నాటి ఇంటర్వ్యూ సందర్భంగా ప్రేమ విషయంపై మీడియా ప్రతినిధి అడిగిన ప్రశ్నకు బెబో బదులిస్తూ.. ‘సరైన సమయం వచ్చినప్పుడు కచ్చితంగా ప్రేమలో పడతా. నేను ప్రేమించే వ్యక్తి ఆలోచనా విధానం నాలాగే ఉండాలి’ అని చెప్పింది. అలాంటి వ్యక్తులు ఎవరైనా ఉన్నారా అని మీడియా ప్రతినిధి మరో ప్రశ్న వేయగా.. కరీనా ఆసక్తికర సమాధానం చెప్పింది.

‘ఈ విషయం చెప్పొచ్చో లేదో తెలీదు కానీ.. నాకు రాహుల్‌ గాంధీ అంటే ఇష్టం. ఆయన గురించి చాలా తెలుసుకోవాలని ఉంటుంది. పత్రికల్లో ఆయన ఫొటోలను చూస్తూ ఉంటా. నాది సినిమా నేపథ్యం ఉన్న కుటుంబం. రాహుల్‌ది రాజకీయ నేపథ్యం ఉన్న కుటుంబం. మా ఇద్దరి విషయాలు ఆసక్తికరంగా ఉంటాయని నా అభిప్రాయం’ అని కరీనా చెప్పుకొచ్చింది.

ఆ తర్వాత షాహిద్‌ కపూర్‌తో కరీనా ప్రేమలో పడిందని, అనంతరం వారిద్దరూ విడిపోయారని వార్తలు చక్కర్లు కొట్టాయి. కొంత కాలం తర్వాత బాలీవుడ్‌ నటుడు సైఫ్‌ అలీ ఖాన్‌ను ప్రేమ వివాహం చేసుకొని కరీనా తన అభిమానులందరినీ ఆశ్చర్యపరిచింది.