తేజ్: కరుణాకరన్ కార్నర్ అవుతున్నాడు!

అసలు ఈ దర్శకుడిని పదే పదే నమ్మి హీరోలు ఎలా అవకాశం ఇస్తున్నారు? అనేదే ఒక పెద్ద మిస్టరీ. దాదాపు రెండు దశాబ్దాల కిందట ఇచ్చిన హిట్ కరుణాకరన్‌కు ఇన్నేళ్ల కెరీర్‌ను ఇచ్చింది. అయితే ఒకటి తర్వాత మరొకటికిగా కరుణాకరన్ సినిమాలు బోల్తా కొడుతూనే ఉన్నాయి. ‘ఉల్లాసంగా ఉత్సాహంగా’, ‘డార్లింగ్’ వంటి మినిమం ఎంటర్‌టైనర్లు మినహాయిస్తే... ‘తొలిప్రేమ’ స్థాయి సినిమా ఒక్కటి కూడా రాలేదు ఇతడి నుంచి. ఇక్కడ విచిత్రం ఏమిటంటే.. కరుణాకరన్ సినిమా సినిమాకూ అదే మూసలోకి మరింత కొట్టుకుపోతున్నాడు తప్ప.. బయట పడేందుకు తనకు తానుగా ఎలాంటి ప్రయత్నాలు చేయడం లేదు.

తొలి సినిమాతోనే జాతీయ అవార్డును సైతం ఒడిసి పట్టిన ఈ దర్శకుడు.. ఇప్పుడు తనను నమ్మి థియేటర్లకు వచ్చిన ప్రేక్షకులను ‘చిత్ర’వధ చేసేదగ్గరకు వచ్చాడు. ఆ సన్నివేశాలను రాసుకున్నప్పుడు వాటితో నవ్వించవచ్చని ఈ దర్శకరచయిత ఎలా అనుకుంటున్నాడో.. ఈ కథలను వినే హీరోలకు, కోట్ల రూపాయల పెట్టుబడే నిర్మాతలకూ ఆ సీన్లు ఎలా ఆకట్టుకుంటున్నాయో తెలియడం లేదు కానీ, థియేటర్లలో ప్రేక్షకులు మాత్రం చాలా విసుగు చెందుతున్నాడు.

గతం మరిచిపోవడం... అనే కాన్సెప్ట్ ఏనాటిది? ఈ ఫార్ములాతో ఎన్ని సినిమాలు వచ్చి ఉంటాయి? అనే విషయంపై సగటు సినీ ప్రేక్షకుడిని అడిగినా బోలెడంత ఇన్ఫర్మేషన్ ఇస్తాడు. ‘ఉల్లాసంగా ఉత్సాహంగా’ సినిమాలో హీరోయిన్ గతం మరిచిపోయిందని ఒక సీన్లు ఆమె స్నేహితురాలు చెబుతుంది. అది సరదాగా చెప్పే విషయం. కాబట్టి దానికి అనుగుణంగా నాలుగైదు సీన్లు ఒక పాట అల్లుకుంటే సరిపోయింది. కానీ.. అలాంటి సిల్లీ పాయింట్‌తో సినిమాను తీసే దుస్సాహసం చేయడం కరుణాకరణ్‌కే చెల్లింది.

ఆ పాయింట్ సినిమాను నిలబెట్టలేదు, అల్లుకున్న ఉపకథలు కూడా ఆకట్టుకోవడం లేదు. ‘తొలిప్రేమ’ తర్వాత ‘తేజ్ ఐ లవ్యూ’ కరుణాకరన్‌కు తొమ్మిదో సినిమా. ఏడాది రెండేళ్లు గ్యాపులతో పెద్ద హీరోలతోనే సినిమాలు చేస్తూ వస్తున్నాడు. అయితే ఇన్నేళ్లు అయినా ఇతడు ‘తొలిప్రేమ’ హ్యాంగోవర్ నుంచి బయటపడలేదు. చక్కిలిగింతలు పెట్టుకున్నా నవ్వురాని సీన్లతో, నవ్వు తెప్పించే ప్రేమకథలతో ఇతడు ముందుకు వెళ్తూ ఉన్నాడు. విమర్శల పాలవుతున్నాడు.