రాయుడు రాకతో.. పాత రికార్డ్స్ పోక సాధ్యమేనా!

ప్రస్తుతం ఇండస్ట్రీలో సినిమా హిట్ టాక్ కంటే ఎంత కలెక్ట్ చేసింది. ఓవర్సీస్‌లో ఎంత వసూళ్లను సాధించిందనే మాటలే ఎక్కువగా వినిపిస్తున్నాయి. కాటమరాయుడు సినిమా రిలీజ్ అవుతుందని తెలిసినప్పటి నుండి ఈ సినిమా ఎంత కలెక్ట్ చేయబోతుందనే ఆలోచనలోనే అటు చిత్రబృందం ఇటు అభిమానులు ఉన్నారు.

బాహుబలి, ఖైదీ నెంబర్ 150, శ్రీమంతుడు వంటి సినిమాలు కాకముందు వరకు కూడా పవన్ కల్యాణ్ నటించిన 'అత్తారింటికి దారేది' సినిమా టాలీవుడ్ లోనే అత్యధిక వసూళ్లను సాధించిన సినిమాగా ఉండేది. కానీ ఇప్పుడు దాని ప్లేస్ మారింది. బాహుబలి మొదటి స్థానంలో ఉండగా రీసెంట్‌గా విడుదలయిన 'ఖైదీ నెంబర్ 150' సినిమా రెండో స్థానంలో ఉంది. శ్రీమంతుడు, జనతాగ్యారేజ్ తరువాత స్థానాల్లో ఉన్నాయి.

పవన్‌కు ఇదే సరైన అవకాశం కాటమరాయుడు కలెక్షన్స్‌తో ఆయన టాప్ మూడు స్థానాల్లో చోటు దక్కించుకోగలిగితే సినిమాపై ఉన్న అంచనాలను చేరుకున్నట్లే. ఇప్పటికే 100 కోట్ల బిజినెస్ చేసిన ఈ సినిమాను రెండు తెలుగు రాష్ట్రాలతో పాటు తమిళనాడు, కర్నాటక వంటి ప్రాంతాల్లో కూడా పెద్ద ఎత్తున రిలీజ్ చేస్తున్నారు. టికెట్స్ రేట్లను కూడా పెంచారు కాబట్టి ఖచ్చితంగా ఈ సినిమా కలెక్షన్స్ ఓ రేంజ్‌లో ఉంటాయని భావిస్తున్నారు.