గతిలేని కథ.. ‘జైసింహా’కు కత్తి రివ్యూ!

కత్తి మహేష్.. ప్రస్తుతం వివాదాలకు కేరాఫ్ అడ్రస్‌గా మారారు. పవన్ కళ్యాణ్ అభిమానులతో రగడ ఆయనకు మంచి గుర్తింపును తెచ్చిపెట్టింది. మొదట్లో సోషల్ మీడియా ద్వారానే స్పందింన మహేష్.. ఇటీవల బహిరంగంగా ప్రెస్ మీట్ పెట్టి పవన్, పూనమ్ కౌర్‌పై తీవ్ర ఆరోపణలు చేశారు. దీంతో అటు పవన్ అభిమానులే కాక చాలా మంది కత్తిపై కారాలు, మిర్యాలు నూరారు. ఈ క్రమంలో సంక్రాంతి సీజన్ రావడం.. ‘అజ్ఞాతవాసి’, ‘జైసింహా’ లాంటి సినిమాలు విడుదలవడంతో మహేష్‌ను పెద్దగా ఎవరూ పట్టించుకోలేదు. కానీ ఈ సినిమాలకు రివ్యూలు ఇవ్వడం ద్వారా మరోసారి ఆయన వార్తల్లో నిలిచారు. ఇప్పటికే ‘అజ్ఞాతవాసి’కి ఆయన నెగిటివ్ రిపోర్ట్ ఇచ్చారు.

పవన్ కళ్యాణ్‌తో వివాదం నడుస్తుంది కాబట్టి మహేష్ అలా ఇచ్చి ఉంటారని చాలా మంది భావించారు. కానీ ఇప్పుడు ‘జైసింహా’కు కూడా ఆయన ఘాటు రివ్యూనే అందించారు. శుక్రవారం ఉదయం ‘జైసింహా’ సినిమా చూసిన కత్తి మహేష్ ట్విట్టర్‌ ద్వారా తన అభిప్రాయాన్ని పంచుకున్నారు. ‘80ల కథకి, 90ల కథనం. గతిలేని కథ. గమనం లేని కథనం. వెరసి ఒక కలగూరగంప సినిమా ‘జైసింహా’. నిరర్ధకమైన కథలోని అసంబద్ధమైన పాత్రలో బాలయ్య. ఎందుకు ఉన్నామో తెలీను హీరోయిన్లు ముగ్గురు. అజ్ఞాతంలోకి మరో సంక్రాంతి సినిమా!’ అంటూ కత్తి మహేష్ ట్వీట్ చేశారు.

ఇప్పటి వరకు పవన్ కళ్యాణ్ అభిమానులతోనే సోషల్ మీడియా ద్వారా ఫైట్ చేసిన కత్తి.. ఈ రివ్యూతో బాలయ్య అభిమానులతోనూ లొల్లి పెట్టుకున్నారు. తమ హీరో సినిమాకు ఇలాంటి రివ్యూ ఇవ్వడం పట్ల బాలయ్య అభిమానులు హాట్ హాట్ కామెంట్లు పెడుతున్నారు.