టెంపర్ రీమేక్‌లో హీరోయిన్ ఆమె కాదన్న డైరెక్టర్

తెలుగులో సూపర్ హిట్ అయిన టెంపర్ సినిమాను హిందీలో రీమేక్ చేసేందుకు ప్రస్తుతం ప్రయత్నాలు జరుగుతున్నాయి. ప్రముఖ బాలీవుడ్ డైరెక్టర్ రోహిత్ శెట్టి ఈ సినిమాను డైరెక్ట్ చేయనున్నాడు. సచిన్ జోషి నిర్మిస్తున్న ఈ సినిమాలో హీరోగా రణ్‌వీర్ సింగ్ నటించనుండగా తెలుగులో కాజల్ అగర్వాల్ పోషించన పాత్రలో కత్రినా కైఫ్ నటించనున్నట్టు బాలీవుడ్‌లో ఓ టాక్ వినిపించింది. అయితే, తాజాగా ఈ వార్తలపై స్పందించిన రోహిత్ శెట్టి... టెంపర్ రీమేక్ కోసం ఇంకా ఏ హీరోయిన్‌ని సంప్రదించలేదని అన్నారు.

ప్రస్తుతం తాను డైరెక్ట్ చేస్తోన్న గోల్‌మాల్ ఏగైన్ అనే చిత్రం షూటింగ్ కోసం హైదరాబాద్ వచ్చిన రోహిత్ శెట్టి దీనిపై స్పందిస్తూ ఈ వివరణ ఇచ్చాడు. ఈ సినిమా కోసం ఇంకా నటీనటులని ఎవరినీ ఎంపిక చేయలేదు. డిసెంబర్‌లోనే ఆ ప్రక్రియ మొదలవుతుందని రోహిత్ శెట్టి స్పష్టంచేశాడు. ఇక రణ్‌వీర్ సింగ్ కెరీర్ విషయానికొస్తే, ప్రస్తుతం సంజయ్ లీలా భన్సాలీ డైరెక్షన్‌లో పద్మావతి చిత్రం షూటింగ్‌తో బిజీగా వున్న రణ్‌వీర్ ఆ తర్వాత జోయ అక్తర్‌తో ఓ సినిమా చేయనున్నాడు. అది కూడా పూర్తయిన తర్వాత 2018లో టెంపర్ రీమేక్ సెట్స్‌పైకి వెళ్లనుంది.