Kerala CM: ‘ది కేరళ స్టోరీ’ ట్రైలర్‌పై సీఎం అసంతృప్తి.. లీగల్ యాక్షన్ తీసుకుంటామని వార్నింగ్!

సన్‌షైన్ పిక్చర్స్ బ్యానర్‌పై విపుల్ అమృత్‌లాల్ షా నిర్మించిన చిత్రం ‘ది కేరళ స్టోరీ’ (The Kerala Story). సుదీప్తో సేన్ (Sudipto Sen) దర్శకత్వం వహించిన ఈ సినిమాలో ఆదా శర్మ (Adah Sharma) ప్రధాన పాత్ర పోషించింది. కేరళ రాష్ట్రంలో వేలాది మంది అమ్మాయిలను ‘లవ్ జిహాద్’ (Love Jihad) పేరుతో ట్రాప్ చేసి, వారిని తీవ్రవాదులుగా మారుస్తున్న సంఘటనలపై ఈ సినిమా తెరకెక్కింది. ఈ చిత్ర ట్రైలర్‌ను ఏప్రిల్ 26న రిలీజ్ చేశారు మేకర్స్. అయితే దీనిపై తాజాగా కేరళ సీఎం (Kerala CM) పినరయి విజయన్ (Pinarayi Vijayan) రియాక్ట్ అయ్యారు. దీన్ని సంఘ్ పరివార్‌ ‘అబద్ధాల ఫ్యాక్టరీ’లో తయారైన ఉత్పత్తిగా తేల్చేశారు. అంతేకాదు అసాంఘిక కార్యకలాపాలకు పాల్పడే వారిపై తప్పకుండా చట్టపరమైన చర్యలు తీసుకుంటామని హెచ్చరించారు.ఈ మేరకు ‘ది కేరళ స్టోరీ’ ట్రైలర్‌పై ఫేస్‌బుక్‌లో సీఎం విజయన్ ఒక పోస్టు పెట్టారు. ‘కేరళకు వ్యతిరేకంగా మతపరమైన విభజన, ద్వేషపూరిత ప్రచారాన్ని వ్యాప్తి చేసే లక్ష్యంతో ఈ సినిమాను ఉద్దేశపూర్వకంగా నిర్మించారనే భావన కలుగుతుంది. సెక్యులరిజంకు చిరునామా అయిన కేరళను మత తీవ్రవాద కేంద్రంగా ముద్ర వేసేందుకు సంఘ్ పరివార్ ఇలాంటి ప్రచారాలను పునరావృతం చేస్తోంది. కేరళలో రాబోయే ఎన్నికల్లో రాజకీయ లబ్ది పొందేందుకే ఆ సంస్థ ఇలాంటి ప్రచార చిత్రాలతో మభ్య పెట్టాలని చూస్తోంది’ అని పేర్కొన్నారు. అధికార లెఫ్ట్ డెమోక్రటిక్ ఫ్రంట్ (ఎల్‌డీఎఫ్), ప్రతిపక్ష యునైటెడ్ డెమోక్రటిక్ ఫ్రంట్ (యూడీఎఫ్), వారి యువజన సంఘాలన్నీ ఈ చిత్రాన్ని వ్యతిరేకిస్తుండగా.. ఈ ప్రకటన వెలువడింది.

దర్యాప్తు సంస్థలు, కోర్టులు, కేంద్ర హోం మంత్రిత్వ శాఖ.. ‘లవ్ జిహాద్’ ఆరోపణలను కొట్టిపారేశాయని అన్నారు. అయితే ఇలాంటి తప్పుడు ఆరోపణల బ్యాక్‌డ్రాప్‌లోనే ఈ సినిమా స్టోరీ ఉందని విజయన్ పేర్కొన్నారు. రాష్ట్రంలో మత సామరస్య వాతావరణాన్ని విచ్ఛిన్నం చేసేందుకు సంఘ్ పరివార్ ఇలాంటి అపోహలను ప్రచారం చేస్తోందని ఆయన ఆరోపించారు. ఇలాంటి ప్రయత్నాలు, ఫేక్ ప్రచారాల పట్ల అప్రమత్తంగా ఉండాలని కేరళ ప్రజలను ఆయన కోరారు.

ఇక ట్రైలర్‌ విషయానికొస్తే.. కేరళలో ఉన్ని కృష్ణన్ (ఆదా శర్మ) సహా చాలా మంది హిందూ అమ్మాయిలను ‘లవ్ జిహాద్’ పేరుతో ట్రాప్‌ చేసి ISISలో ఎలా చేర్చారు? వారిని టెర్రర్ ఎటాక్స్ కోసం ఎలా వాడుకుంటారు? అనేది చూపించారు. కాగా ఈ చిత్రం మే 5న తెలుగు, తమిళ్, మలయాళ, హిందీ భాషల్లో విడుదల కానుంది.

• Read latest Tollywood updates and Telugu News