నటిపై లైంగిక వేధింపుల కేసులో పోలీసులకి షాక్

మళయాళం సినీ నటిపై లైంగిక వేధింపుల కేసులో విచారణ జరుపుతున్న కేరళ స్పెషల్ ఇన్వెస్టిగేషన్ టీమ్‌కి అనుకోని షాక్ ఇచ్చారు బాధిత నటి. నటిపై కుట్ర పన్ని, ఒక పథకం ప్రకారం దిలీప్ నేరానికి పాల్పడ్డాడనే అభియోగాల కింద అతడిపై కేసు నమోదు చేసి తమ అదుపులోకి తీసుకున్నారు సిట్ పోలీసులు. కానీ దిలీప్ అరెస్ట్ అనంతరం బాధిత నటి వద్ద వాంగ్మూలం తీసుకున్న పోలీసులకి ఆమె నుంచి దిమ్మ తిరిగిపోయే సమాధానం వచ్చినట్టు తెలుస్తోంది.

తనపై దాడికి పాల్పడిన వారిలో దిలీప్ వున్నాడని కానీ, లేదా అతడి ప్రమేయం వుందని కానీ తానెప్పుడు చెప్పలేదు. అటువంటప్పుడు పోలీసులు దిలీప్‌ని ఎందుకు అరెస్ట్ చేశారో అర్థం కావడం లేదని వాపోయిందట సదరు బాధిత నటి. అంతేకాకుండా ఈ కుట్రలో దిలీప్ ప్రమేయం వుందని తాను భావించడం లేదని నటి ఇచ్చిన వాంగ్మూలం చూసిన పోలీసులు ఖంగుతిన్నారట. ఇప్పుడిప్పుడే ఈ కేసు విచారణని వేగవంతం చేసి అసలు నిందితులని పట్టుకున్నామనే జోష్‌లో వున్న పోలీసులకి ఆ నటి ఇచ్చిన వాంగ్మూలం కొంత ఇబ్బందికి గురిచేసినట్టు సమాచారం.

అయితే, కొంతలో కొంత పోలీసులకి ఊరటనిచ్చిన అంశం ఏంటంటే... " ఒకవేళ నిజంగానే ఈ కుట్రలో దిలీప్ హస్తం కానీ వుండి వుంటే, కచ్చితంగా అతడిని శిక్షించాల్సిందే" అని తన వాంగ్మూలంలో పేర్కొందట ఆ నటి. కనీసం ఇక్కడైనా ఆమె ఇచ్చిన వాంగ్మూలం తమ విచారణకి సహకరించేలా వుందిలే అని సరిపెట్టుకున్నారట కేరళ పోలీసులు.