ఆస్కార్ కోసం 30 ఏళ్లుగా దండయాత్ర!

సినీ రంగానికి సంబంధించి ప్రపంచవ్యాప్తంగా పేరున్న అవార్డు.. ‘ఆస్కార్’. దాని కోసం.. నటీనటులు, టెక్నీషియన్లు తీవ్రంగా పోటీ పడుతుంటారు. కొన్ని సార్లు ఏదైనా కేటగిరీలో నామినేట్‌ అయినా చాలు.. ప్రపంచవ్యాప్తంగా గుర్తింపు లభిస్తుంది. అంతటి ప్రాముఖ్యం ఉన్న అకాడమీ అవార్డులకు 21 పర్యాయాలు నామినేట్ అయ్యాడు ఓ వ్యక్తి. 20 సార్లు నామినేషన్‌తోనే సరిపెట్టుకున్న అతడు పట్టు వదలని విక్రమార్కుడిలా.. 21వ సారి అవార్డును గెలుచుకున్నాడు.
హాలీవుడ్‌ సినిమాలకు సౌండ్‌ మిక్సింగ్‌లో సేవలందించే కెవిన్‌ ఓ కనెల్‌ 34 ఏళ్లుగా ఆస్కార్ అవార్డు కోసం దండయాత్ర చేస్తున్నాడు. 1983 నుంచి 2016 వరకు ఆయన 20 సార్లు సౌండ్‌ మిక్సింగ్‌ కేటగిరిలో ఆస్కార్‌ అవార్డులకు నామినేట్‌ అయ్యాడు. కానీ అన్నిసార్లూ నిరాశే దక్కింది. తాజాగా ప్రకటించిన 2017 అకాడమీ అవార్డుల్లో కెవిన్‌కు కూడా ఒక అవార్డు దక్కింది. అంటే చిట్టచివరికి 21వ సారి ఆయన నిరీక్షణకు తెర పడిందన్నమాట.

‘హక్సా రిడ్జ్‌’ సినిమాకుగాను ఆయన ‘ఉత్తమ సౌండ్‌ మిక్సింగ్‌’ అవార్డు అందుకున్నారు. ‘టాప్‌ గన్‌’, ‘ట్రాన్స్‌ఫార్మర్స్‌’, ‘స్పైడర్‌మ్యాన్‌-2’ తదితర హిట్ సినిమాలకు సౌండ్‌ మిక్సింగ్‌ అందించింది కెవినే. ఆస్కార్ సాధించడానికి ముందే అతడికి రావాల్సినంత పేరు వచ్చింది. ఆస్కార్ లాంటి ప్రతిష్టాత్మక అవార్డులకు 21 సార్లు ఒకే కేటగిరీ నుంచి నామినేట్ అవ్వడం గొప్ప విషయమే కదా!