‘ఖైదీ నం.150’లో చిరు రెండో పాత్ర ఎలా ఉంటుందో..?

చిరంజీవి నటిస్తోన్న 'ఖైదీ నెంబర్ 150' తమిళ 'కత్తి' సినిమాకు రీమేక్ అనే విషయం అందరికీ తెలిసిందే. నిజానికి ఈ సినిమాలో హీరో రెండు గెటప్పుల్లో కనిపిస్తాడు. ఒకటి యంగ్ లుక్ కాగా.. మరొకటి ఓల్డ్ మ్యాన్ లుక్. అయితే ‘ఖైదీ నం.150’ సినిమాలో చిరు లుక్స్‌ను ఒక్కొక్కటిగా రివీల్ చేస్తూ వస్తోంది చిత్ర యూనిట్. అన్ని ఫొటోల్లోనూ చిరు యంగ్ లుక్‌ను మాత్రమే చూపిస్తున్నారు. అరవై ఏళ్ల వ్యక్తిని ముప్పై ఏళ్ల యువకుడిగా చూపించి బాగానే మార్క్స్ కొట్టేసింది చిత్ర బృందం. చిరు అభిమానులను కూడా ఈ లుక్ ఎంతగానో ఆకట్టుకుంటుంది.

అయితే సినిమాలో మరో లుక్ కూడా ఉంది కదా..? మరి దాన్ని ఎందుకు రివీల్ చేయడం లేదో..? ఒకవేళ ఆ లుక్ బయటకు వస్తే మెగా అభిమానులు నిరాశ పడతారనే ఆలోచనతోనే ముందు నుంచి యూనిట్ యంగ్ లుక్‌నే ప్రమోట్ చేస్తూ వస్తోంది. గతంలో కూడా చిరు ఓల్డ్ గెటప్స్‌లో కనిపించారు. ఆయనకు ఈ రోల్ కొత్తేమీ కాదు. కానీ ఆయన కొత్త లుక్‌తోనే సినిమాకు ఊపు వస్తుందనే ఆలోచనతో చిత్ర బృందం ఇలా ప్లాన్ చేసింది.

ఇప్పటికే నాలుగు పాటలు బయటకు వచ్చేశాయి. ఆఖరి పాటలో కచ్చితంగా చిరు ఓల్డ్ గెటప్ రివీల్ చేయాల్సిందే. లేదంటే జనవరి 4న జరగబోయే ప్రీరిలీజ్ ఫంక్షన్‌లో విడుదల చేసే ట్రైలర్ ద్వారా అయినా ఈ లుక్ బయటకి రావాల్సిందే. అభిమానులు కూడా ఈ లుక్ ఎలా ఉంటుందో అని ఆసక్తిగా ఎదురుచూస్తున్నారు!