​భార్యకు తన సినిమాల్లో ఛాన్సివ్వనన్నాడు..!

తన భార్య ర‌మ్యకృష్ణ ను తన సినిమాల్లో నటింపజేసే ఉద్దేశం లేదని అన్నాడు దర్శకుడు కృష్ణవంశీ. అసలు తన సినిమాల్లో ఆమెకు ఛాన్స్ ఇవ్వనని అన్నాడు. రమ్యను ఒక ఆర్టిస్టుగా చూడలేనని అందుకే.. తమ కాంబోలో సినిమా రాదని ఈ దర్శకుడు స్పష్టం చేశాడు. ప్రస్తుతం ‘నక్షత్రం’ సినిమాను విడుదలకు సిద్ధం చేసే పనిలో ఉన్నాడు కృష్ణవంశీ. ఈ సందర్భంగా ఆయన భార్య ర‌మ్యకృష్ణ విషయంలో స్పందించాడు.

కృష్ణవంశీ దర్శకత్వంలో వచ్చిన ‘చంద్రలేఖ’ సినిమాలో రమ్య ప్రధాన పాత్రను పోషించింది. ఆ తర్వాత వీరిద్దరూ పెళ్లి చేసుకున్నారు. వివాహానంతరం కూడా రమ్య నటిగా కెరీర్ ను కొనసాగిస్తున్నారు. మరోవైపు కృష్ణవంశీ కూడా దర్శకుడిగా బిజీగానే ఉన్నారు. ఈ క్రమంలో కృష్ణవంశీ హోం ప్రొడక్షన్ లో వచ్చిన ‘శ్రీ ఆంజనేయం’ సినిమాలో రమ్య నటించారు. అయితే అది ఫుల్ లెంగ్త్ రోల్ కాదు. ఊరికే అలా కనిపించి వెళ్లారంతే.

ఆ తర్వాత మాత్రం మళ్లీ భర్త డైరెక్షన్ లో రమ్య నటించలేదు. ఇటీవల ‘బాహుబలి’తో రమ్యకు ఆర్టిస్టుగా మరింత మంచి పేరొచ్చింది. మరి ఇప్పుడు రమ్యను ప్రధాన పాత్రలో పెట్టి సినిమా తీసే ఉద్దేశం ఉందా? అంటే కృష్ణ వంశీ నో చెప్పారు. తన భార్యను తను ఆర్టిస్టుగా చూడలేనన్నారు. ఆమెను తన సినిమాల్లో నటింపజేసే ఉద్దేశం లేదని స్పష్టం చేశారు.