వర్మ.. మానవరూపంలో ఉన్న నారదుడు: లక్ష్మీపార్వతి

దివంగత ముఖ్యమంత్రి, తెలుగుదేశం పార్టీ వ్యవస్థాపకుడు ఎన్టీఆర్‌పై ఆయన తనయుడు, హీరో బాలకృష్ణ తీయబోయే బయోపిక్, వర్మ తలపెట్టిన 'లక్ష్మీస్ ఎన్టీఆర్' చిత్రాలపై లక్ష్మీ పార్వతి స్పందించారు. ఎన్టీఆర్ జీవితాన్ని సినిమా తీస్తానన్న బాలయ్య ప్రయత్నాన్ని ఆమె అభినందించారు. తన తండ్రి జీవితంలోని విజయ గాథలను మాత్రమే చూపిస్తానని బాలయ్య చెప్పారని, దీన్ని అందరూ హర్షిస్తారని లక్ష్మీపార్వతి అన్నారు. ఆయన జీవితం మొత్తాన్నీ సినిమాగా చూపించాలని తానేమీ కోరుకోవడం లేదని తెలిపారు. అంతేకాదు ఎన్టీఆర్ జీవితాన్ని ఒక పుస్తకంగా తీసుకొస్తే భావితరాల వారికి ఎంతో ఉపయోగకరంగా ఉంటుందని ఆమె వ్యాఖ్యానించారు. రాంగోపాల్ వర్మ అంటేనే వివాదాలకు పుట్టిల్లని, బహుశా నారదుడు ఈ జన్మలో వర్మ రూపంలో పుట్టుండవచ్చని ఆమె చమత్కరించారు.

వివాదాలతో సావాసం చేసే వ్యక్తి సినిమాతీస్తే, వివాదాలు రాకుండా ఉంటాయా అని ప్రశ్నించారు. ఆయన హింస, దెయ్యాల సినిమాలు తీసి జనాలను భయపెట్టడం తప్ప, సమాజానికి సందేశం ఇచ్చేలా ఒక్క చిత్రం కూడా తీయలేదని ఆరోపించారు. డ్రగ్స్ కేసులో సినీ ప్రముఖులు విచారణకు హాజరైనప్పుడు చార్మీని ఝాన్సీ లక్ష్మీబాయితో పోల్చడం ఏంటని మండిపడ్డారు. ఇలాంటి వ్యాఖ్యలు చూస్తుంటే, ఆయన దారి తప్పిన మేధావని తనకు అర్థమైందని, వర్మ తన తెలివితేటలను మంచికి వినియోగిస్తే బాగుండేదని అన్నారు. అంతేకాదు వర్మను నారదుడితో పోల్చడం కూడా తప్పేనని, ఆయనకు కలహభోజనుడు అని పేరు ఉన్నా, అవన్నీ లోకకల్యాణం కోసమేనని, వర్మ వ్యాఖ్యల వల్ల లోక వినాశనం తప్ప, ఒరిగేది ఏమీ ఉండదని ఆరోపించారు.

వర్మ తీసిన సినిమాల్లో ఒక్కటైనా సమాజానికి ఉపయోగపడవని, అది ఆయన వికృతమైన స్వభావానికి పరాకాష్ట అని లక్ష్మీపార్వతి వ్యాఖ్యానించారు. పులి లేడిగా మారి, తాను సాధు స్వభావంతో ఉన్నానన్న మాదిరిగా, వివాదాల వర్మ వచ్చి మహానాయకుడి జీవితాన్ని సినిమాగా తీస్తానడం నాకు నచ్చలేదని కుండబద్దలు కొట్టినట్లు చెప్పారు. తీయగలిగే ధైర్యం, దమ్ము ఉంటే ప్రేక్షకులు మెచ్చేలా సినిమా తీయాలని లక్ష్మీపార్వతి సూచించారు.