గీతగోవిందం.. ఫస్ట్ లుక్ లవ్లీ పెయిర్!

‘అర్జున్ రెడ్డి’ హీరో విజయ్ దేవరకొండ తదుపరి సినిమాల గురించి ప్రేక్షకులు ఆసక్తితోనే ఎదురుచూస్తున్నారు. అర్జున్ రెడ్డి తర్వాత ఈ హీరో సినిమా ఒకటి వచ్చినా.. అది ఎవరికీ పట్టలేదు. ఆ సినిమాను విజయ్ ఎప్పుడో ఒప్పుకోవడం, షార్ట్ ఫిల్మ్ స్థాయి నాణ్యతతో ఉండటంతో దాన్ని ఎవరూ పట్టించుకోలేదు. మరోవైపు ఈ హీరో ‘టాక్సీవాలా’ ఆసక్తిని రేపినా... అది వాయిదాల మీదే పోతోంది. ఇప్పటికే విడుదల కావాల్సిన ఆ సినిమా ఇంకా విడుదల కావాల్సిన సినిమాగా నిలుస్తోంది. దాని విడుదలపై ఇంకా పూర్తి క్లారిటీ లేదు. ఇక ‘మహానటి’లో విజయ్ ఉన్నా.. అది ప్రధానంగా సావిత్రి బయోపిక్. విజయ్ సోలో సినిమా కాదది.

ఇక ఇంతలోనే విజయ్ మరో సినిమా రెడీ అయిపోతోంది. ఇదే ‘గీతగోవిందం’. పరశురాం దర్శకత్వంలో బన్నీ వాస్ నిర్మాణంలో రూపొందుతున్న ఈ సినిమాకు సంబంధించిన ఫస్ట్ లుక్ తాజాగా విడుదల అయ్యింది. రష్మిక హీరోయిన్ గా నటించింది ఈ సినిమాలో. ఫస్ట్ లుక్‌లో విజయ్, రష్మికల రొమాంటిక్ స్టిల్‌ను విడుదల చేశారు దీని రూపకర్తలు. వీళ్లిద్దరి పెయిర్ లవ్లీగా ఉందని ప్రేక్షకులు అంటున్నారు.

ఈ సినిమా త్వరలోనే విడుదల అని ఫస్ట్ లుక్ పోస్టర్ లో పేర్కొన్నారు. అయితే విడుదల తేదీని కచ్చితంగా ప్రకటించలేదు. జూలై లేదా ఆగస్టులో ఈ సినిమా విడుదల కావొచ్చని అంచనా. ‘టాక్సీవాలా’ కూడా అప్పుడే విడుదల కాస్త అటూ ఇటుగా ఈ నెలల్లోనే విడుదల అయ్యే అవకాశాలున్నాయి.