‘స్పైడర్’ విడుదల ఇంకా వెనక్కి?

తెలుగు ప్రేక్షకులు ఆసక్తిగా ఎదురు చూస్తున్న సినిమాల్లో ‘స్పైడర్’ ఒకటి. సూపర్‌స్టార్ మహేష్ బాబు, సెన్సేషనల్ డైరెక్టర్ ఎ.ఆర్. మురుగదాస్ కాంబినేషన్‌లో ‘స్పైడర్’ తెరకెక్కుతుండటంతో ఈ సినిమాపై అంచనాలు భారీగా ఉన్నాయి. అయితే ‘పోస్ట్‌పోన్’ పేరుతో ఈ సినిమాపై ఇప్పటికే విమర్శలు, అసహనాలు ఎక్కువైపోయాయి. టైటిల్, టీజర్ పోస్ట్‌పోన్లతో అభిమానులను నిరుత్సాహానికి గురిచేసిన ‘స్పైడర్’ టీం ఇప్పుడు సినిమా విడుదల తేదీలోనూ దీన్నే ఫాలో అవుతోంది.

ఏడాది నుంచి షూటింగ్ దశలోనే ఉన్న ఈ సినిమాను మొదట ఈ ఏడాది జూన్ 23న విడుదల చేయాలనుకున్నారు. అయితే సినిమా క్లైమాక్స్‌లో కొన్ని మార్పుల వల్ల ‘స్పైడర్’ విడుదల రెండు నెలల వెనక్కి వెళ్లింది. మొత్తానికి మహేష్ పుట్టిన రోజు సందర్భంగా ఆగస్టు 9న ఈ సినిమా విడుదల చేయడానికి చిత్ర బృందం ప్రయత్నిస్తుందని వార్తలు వచ్చాయి. దీంతో మహేష్ అభిమానులు కూడా తెగ సంబరపడిపోయారు.

అయితే తాజా వార్త అభిమానులను మరోసారి నిరుత్సాహానికి గురిచేస్తోంది. ‘స్పైడర్’ను ఆగస్టు 9న కాకుండా 11న విడుదల చేయాలని భావిస్తున్నారట. ఈ మేరకు సినీ విశ్లేషకుడు రమేష్ బాల ట్విట్టర్ ద్వారా వెల్లడించారు. ఈయనతో పాటు పరిశ్రమకు చెందిన పలువురు ఈ విషయాన్ని ఖరారు చేస్తున్నారు. అయితే దీనిపై అధికారికంగా ఎలాంటి ప్రకటన లేదు. కాగా, ‘స్పైడర్’లో మహేష్ బాబు ఇంటెలిజెన్స్ అధికారి పాత్రలో కనిపించనున్నాడు.
. @urstrulyMahesh - Dir @ARMurugadoss 's #SPYder to release on Aug 11th! pic.twitter.com/fxyzJ6IJoj — Ramesh Bala (@rameshlaus) April 30, 2017