తప్పదు.. మహేశ్ బాబు కోర్టుకు రావాల్సిందే!

‘శ్రీమంతుడు’ సినిమా కాపీ వ్యవహారం విచారణకు సంబంధించి ఆ సినిమా హీరో మహేశ్ బాబుకు వ్యక్తిగత హాజరీ నుంచి మినహాయింపును ఇవ్వలేమని నాంపల్లి కోర్టు స్పష్టం చేసింది. విచారణకు మహేశ్ బాబు హాజరు కావాల్సిందే అని కోర్టు ఆదేశాలు జారీ చేసింది. మహేశ్ బాబు హీరోగా కొరటాల శివ దర్శకత్వంలో రూపొందిన ‘శ్రీమంతుడు’ సినిమా కు సంబంధించిన కాపీ వ్యవహారం కొన్నాళ్లుగా కోర్టులో ఉన్న సంగతి తెలిసిందే.

తను ఒక వారపత్రికలో రాసిన ‘చచ్చేంతప్రేమ’ సీరియల్ ను కాపీ కొట్టే ‘శ్రీమంతుడు’ సినిమాను రూపొందించారని శరత్ చంద్ర అనే రచయిత కొన్నాళ్ల కిందట నాంపల్లి కోర్టులో కేసు దాఖలు చేశారు. తన అనుమతి లేకుండా ఆ సినిమాను రూపొందించడం కాపీ రైట్ చట్టం ఉల్లంఘనే అవుతుందని ఆ రచయిత వాదిస్తున్నాడు. దీనిపై ఇప్పటికే నోటీసులు జారీ అయ్యాయి. తాజాగా శ్రీమంతుడు నిర్మాత నవీన్ కు సమన్లను జారీ చేసిన నాంపల్లి కోర్టు, విచారణకు శ్రీమంతుడు హీరో మహేశ్ కూడా హాజరు కావాల్సిందేనని స్పష్టం చేసింది.

ఇది వరకే ఈ పిటిషన్ విచారణకు వ్యక్తిగత మినహాయింపును పొందారు మహేశ్, కొరటాల. హై కోర్టుకు వెళ్లి వారు వ్యక్తిగత హాజరీ నుంచి మినహాయింపును తెచ్చుకున్నారు. అయితే తాజాగా ఈ కేసును విచారించిన నాంపల్లి న్యాయస్థానం మాత్రం మహేశ్ కు మినహాయింపును ఇవ్వలేమని ఆయన విచారణకు హాజరు కావాల్సిందేనని స్పష్టం చేసింది.