Shiva Nirvana ‘మజిలీ’లో బుజ్జి మలుపు.. ఫాదర్‌గా ప్రమోషన్!

‘మజిలీ’ దర్శకుడు శివ నిర్వాణ ప్రస్తుతం తన జీవితంలో మధురమైన క్షణాలను గడుపుతున్నారు. రెండు విజయాలు ఆయన్ని ఒకేసారి వరించాయి. ఒకటి వృత్తిపరమైన విజయం అయితే.. మరొకటి వ్యక్తిగతమైన విజయం.

‘నిన్నకోరి’ సినిమాతో దర్శకుడిగా పరిచయమైన శివ నిర్వాణ తొలి చిత్రంతోనే విజయాన్ని అందుకున్నారు. రెండో సినిమాగా ‘మజిలీ’ని తెరకెక్కించారు. నాగచైతన్య కెరీర్‌లోనే ది బెస్ట్ సినిమాగా దీన్ని తీర్చిదిద్దారు. ఈ సినిమాను ప్రేక్షకులు విశేషంగా ఆదరిస్తున్నారు. విమర్శకులు సైతం ప్రశంసలు కురిపిస్తున్నారు. సినిమాను చూసిన టాలీవుడ్ ప్రముఖులంతా శివను ఆకాశానికి ఎత్తేస్తున్నారు. ఈ ఆనంద క్షణాల మధ్య మరో సంతోషకరమైన వార్తను శివ తెలియజేశారు.

ఇటీవల తనకు పండంటి మగబిడ్డ జన్మించినట్టు శివ ట్విట్టర్ ద్వారా వెల్లడించారు. ‘ఇటీవలే నాకు కొడుకు పుట్టాడు. నా మజిలీలో ఒక బుజ్జి మలుపు. ఇంతకు మించి ఇంకేమీ అడగొద్దు’ అని శివ తన ట్వీట్‌లో పేర్కొన్నారు. అంటే, శివకు ఇది డబుల్ ధమాకా అన్న మాట. కొడుకు వచ్చీ రావడంతో తన తండ్రికి విజయాన్ని తీసుకొచ్చాడు. శివ తండ్రైన సందర్భంగా ఆయనకి సమంత, నాగచైతన్య ట్విట్టర్ ద్వారా శుభాకాంక్షలు తెలిపారు.