బాలీవుడ్ జంటకి విడాకులు మంజూరు

బాలీవుడ్‌లో ప్రధానంగా చర్చనియాంశమైన విడాకుల కేసుల్లో అర్బాజ్ ఖాన్, మలైకా అరోరా ఖాన్ దంపతుల వ్యవహారం ఒకటి. 1998లో పెళ్లి చేసుకుని ఒక్కటైన ఈ జంట 18 ఏళ్ల తర్వాత అధికారికంగా విడిపోయింది. ఏడాది క్రితం ఈ జంట చేసుకున్న దరఖాస్తుని పరిశీలించిన ముంబైలోని బాంద్రా కోర్టు గురువారం విడాకులు మంజూరు చేసింది. బాంద్రా కోర్టు తీర్పుతో వీరి డైవర్స్ ఇక అధికారికం అయిపోయింది.

అర్బాజ్, మలైకాల తనయుడు అర్హాన్‌ని తల్లి కస్టడీలోకే ఇచ్చినప్పటికీ.. తండ్రి అర్బాజ్ ఎప్పుడు అనుకుంటే అప్పుడు అతడిని కలిసేందుకు కోర్టు అనుమతి ఇచ్చింది. ఈ విడాకుల వ్యవహారానికి ముందురోజే తనయుడు అర్హాన్‌తో కలిసి జస్టిన్ బైబర్ కన్సర్ట్‌లో ఎంజాయ్ చేసింది ఈ జంట. గత నవంబర్‌లో విడాకుల కోసం దరఖాస్తు చేసుకున్న తర్వాత కూడా ఈ ఇద్దరూ అనేక సందర్భాల్లో కలిసి పార్టీ చేసుకోవడం, స్నేహితులతో కలిసి సరదాగా గడిపిన తీరు మీడియా దృష్టిని ఆకర్షించింది. తమ మధ్య వున్న విభేదాలు ఏవీ అర్హాన్ పెంపకంపై కానీ అతడితో సరదాగా గడిపే విషయంలో కానీ ప్రభావం చూపించనివ్వకూడదని అర్బాజ్, మలైకా డిసైడ్ అయినట్టు వారి ప్రవర్తననిబట్టిచూస్తే అర్థమవుతోంది.