అర్జున్ కపూర్‌తో ఎఫైర్‌పై స్పందించిన మలైకా అరోరా ఖాన్

సల్మాన్ ఖాన్ ఫ్యామిలీని కృష్ణ జింకల కేసు తర్వాత మళ్లీ అంతకన్నా ఎక్కువ వేధించిన విషయం ఏదైనా వుందా అంటే... అది ఆయన తమ్ముడు అర్బాజ్ ఖాన్, మరదలు మలైకా అరోరా ఖాన్‌ల విడాకుల వ్యవహారం అనే చెప్పవచ్చు. బయటకు చెప్పుకోకపోయినా ఈ విషయంలో సల్మాన్ కుటుంబం ఒక విధంగా చాలా ఆవేదనకు గురైందనే సంగతి అందరికీ తెలిసిందే. అన్నింటికన్నా ముఖ్యంగా బోనీ కపూర్ తనయుడు, నటుడు అర్జున్ కపూర్‌తో ఎఫైర్ కారణంగానే మలైకా, తన భర్త అర్బాజ్‌కి విడాకులు ఇవ్వడానికి సిద్ధపడిందనే వార్తలు వారిని మరింత బాధించాయి. కానీ ఈ వార్తలపై మీడియాతో ఎవ్వరూ ఎక్కడా ఏమీ స్పందించలేదు.

అర్బాజ్ ఖాన్, మలైకా, అర్జున్ కపూర్... ఈ ముగ్గురిలోనూ ఎవ్వరూ ఈ వార్తలపై స్పందించలేదు. మీడియా ఎవరిని, ఎన్నిసార్లు ప్రశ్నించే ప్రయత్నం చేసినా... ఆ ప్రశ్నల్ని తమ చెవికి ఎక్కించుకోకుండా ఆ ప్రశ్నని దాటేస్తూ పోయారు. దీంతో అర్బాజ్-మలైకాల విడాకులకి అసలు కారణం ఏంటనేది మాత్రం ప్రస్తుతానికి ఒక మిస్టరీగానే మిగిలిపోయింది.

ఇదిలావుంటే, అర్బాజ్‌కి దూరమైన తర్వాత మలైకా, అర్జున్ కపూర్‌తో సన్నిహితంగా వుంటోందనే వార్తలు ఎక్కువయ్యాయి. దీంతో ఇకనైనా స్పందించకపోతే కష్టం అనుకుందో లేక ఆ తర్వాత ఆలస్యంగా స్పందించినా ఫలితం వుండదు అనుకుందో ఏమో కానీ ఎట్టకేలకు ఈమధ్యే మలైకా అరోరా ఖాన్ ఈ విషయంపై స్పందించింది. అర్జున్ కపూర్ తనకి మంచి మిత్రుడు మాత్రమే. కానీ మామధ్య వున్న స్నేహబంధాన్ని అందరూ అపార్థం చేసుకుంటున్నారు అని వివరించిందామె. మలైకా చెప్పిన ఈ సమాధానం అయినా ఇకపై గాసిప్‌రాయుళ్ల నోళ్లు మూపిస్తుందేమో చూడాలి మరి!!

ప్రస్తుతం అర్బాజ్ ఖాన్-మలైకా అరోరా ఖాన్‌లు మరో 6 నెలలపాటు వెయిటింగ్ పీరియడ్‌లో వున్నారు. ఈలోగా ఆ ఇద్దరి మనసు మారితే మళ్లీ కలిసుండే ఛాన్స్ వుంది. కానీ వాళ్లిద్దరి మధ్య వున్న ప్రస్తుత పరిస్థితులు, జరుగుతున్న పరిణామాలు చూస్తోంటే, తిరిగి ఆ ఇద్దరూ ఏకమవుతారు అనే గ్యారెంటీ కూడా కనిపించడం లేదనే అభిప్రాయం వ్యక్తమవుతోంది. ఈ ఇద్దరి వైవాహిక జీవితం ఎటువైపు వెళ్లనుందో ఇంకో 6 నెలలు ఆగితే కానీ తెలిసే ఛాన్స్ లేదేమో!!