రాత్రి వేళ ఆ కానిస్టేబుల్ ప్రశ్నలతో ఇబ్బంది పడ్డా.. చాలా బాధ కలిగించింది: నటి అర్చనా కవి

తన ఫ్యామిలీ ఫ్రెండ్‌, ఆమె పిల్లలతో కలిసి బయటకు వెళ్లి.. రాత్రి 11 గంటల సమయంలో తిరిగి ఇంటికి వస్తుండగా ఓ కానిస్టుబుల్ అడిగిన ప్రశ్నలతో ఇబ్బంది పడ్డానని మలయాళ నటి అర్చనా కవి ఆరోపణలు చేసింది. ఆటోలో తిరిగి ఇంటికి వస్తుండగా.. పెట్రోలింగ్‌లో భాగంగా కొచ్చి పోలీసులు ఆటోను ఆపారని చెప్పింది. ఓ కానిస్టేబుల్ తమ దగ్గరకు వచ్చి ఎవరు పిల్లలు..? ఎక్కడికి తీసుకు వెళుతున్నారు..? అంటూ ప్రశ్నించాడని.. తాము ఇంటికి వెళుతున్నామని చెప్పినా పట్టించుకోలేదని తెలిపింది.

అతను తమను నమ్మడానికి సిద్ధంగా లేడని.. పిచ్చి పిచ్చి ప్రశ్నలతో ఇబ్బంది పెట్టాడని అర్చన పేర్కొంది. ఈ ఘటన తనను ఎంతో వేధించిందంటూ ఆమె సోషల్ మీడియా వేదికగా తనకు జరిగిన చేదు అనుభవాన్ని పంచుకుంది. ఈ ఘటనపై కొచ్చి డీసీపీ స్పందించారు. తాము అంతర్గత విచారణ నిర్వహిస్తున్నామని చెప్పారు. సినీనటి, పోలీస్‌ కానిస్టేబుల్ ఇద్దరి వాదనలు విన్నామని తెలిపారు. అయితే కానిస్టేబుల్ మాట్లాడిన సమయంలో నటి మాస్క్ పెట్టుకోవడంతో గుర్తుపట్టలేకపోయారని అన్నారు. అలాంటి పరిస్థితుల్లో ఎవరు ఉన్నా.. కానిస్టేబుల్ దురుసుగా ప్రవర్తించడం సరైంది కాదన్నారు.

పోలీస్‌ కానిస్టేబుల్‌ ఉద్దేశపూర్వకంగా చేయలేదని.. అయినా నటి అర్చనా కవి ఈ ఘటన వల్ల ఇబ్బంది పడ్డారని డీసీపీ చెప్పారు. ఈ ఘటనపై విచారణ నిర్వహించి.. కానిస్టేబుల్‌కు నోటీసులు ఇస్తామన్నారు. పలు మలయాళ సినిమాల్లో ఆమె నటించగా.. తెలుగులో బ్యాక్‌ బెంచ్‌ స్టూడెంట్‌ మూవీలో హీరోయిన్‌గా యాక్ట్ చేసింది.