బిడ్డకు పాలిస్తూ.. మలయాళి నటి ఫోజు!

ప్రముఖ మలయాళి నటి, రచయిత, మోడల్ గిలు జోసెఫ్.. ఓ మేగజిన్ కవర్ పేజీ కోసం ఓ బిడ్డకు పాలిస్తూ ఫొటోలకు ఫోజివ్వడం సోషల్ మీడియాలో వివాదాస్పదంగా మారింది. బిడ్డకు చనుపాలు ఇవ్వడంపై ప్రజల్లో అవగాహన కల్పించేందుకు ‘గృహలక్ష్మీ’ అనే మేగజిన్.. 27 ఏళ్ల గిలు జోసెఫ్‌ను సంప్రదించింది. ఇందుకు గిలు జోసెఫ్ అంగీకరించింది. అయితే, దీనిపై సోషల్ మీడియాలో భిన్న స్వరాలు వినిపిస్తున్నాయి. ఓ భారతీయ స్త్రీ, హిందూ మహిళ బిడ్డకు పాలివ్వడాన్ని ఇలా బహిరంగంగా ప్రచురించడం అభ్యంతరకరంగా ఉందని పలువురు వ్యాఖ్యానించారు.

అయితే, ఈ వివాదంపై నటి జోసెఫ్ స్పందిస్తూ.. ‘‘ఇందులో తప్పేముంది? బిడ్డకు పాలివ్వడమనేది తల్లికి బిడ్డకు ఉన్న బంధాన్ని తెలియజేస్తుంది. మరింత ముఖ్యంగా అమ్మతనాన్ని చూపిస్తుంది. దీన్ని నగ్నత్వంగా భావిస్తే అంతకంటే సిగ్గుచేటు మరేదీ లేదు. ఇలాంటి ఫోజు ఇచ్చినందుకు నేను ఎంతో గర్వంగా ఫీలవ్వుతున్నా.’’ అని తెలిపింది.

అమ్మ, చెల్లి ఒప్పుకోలేదు, అయినా..: బిడ్డకు పాలిస్తూ తాను ఫొటోకు ఫోజిస్తున్నా అని మా అమ్మా, చెల్లికి చెప్పాను. ఇందుకు వారు అస్సలు ఒప్పుకోలేదు. అయితే, ఈ చిత్రం ద్వారా మహిళలు, అమ్మలు, భార్యలకు నేను ఒక విషయం స్పష్టం చేయాలని అనుకుంటున్నా. మీ పిల్లలకు ధైర్యంగా పాలివ్వండి. అది ఓ అపూర్వ అవకాశం. సిగ్గుపడొద్దు’’ అని జోసెఫ్ తెలిపింది.