​పవన్ కల్యాణ్ కు మామ గా.. ఆ స్టార్ హీరో! ఓకేనా?!

మలయాళీ స్టార్ హీరో మమ్ముట్టీ.... కొన్ని తెలుగు సినిమాల్లో నటించారు. తెలుగులో చేసిన సినిమాల్లో తన పాత్రలకు తనే డబ్బింగ్ చెప్పుకున్న ఘనత ఈ స్టార్ హీరోది. ఇక అడపాదడపా మమ్ముట్టీ సినిమాలు తెలుగులోకి అనువాదం అవుతూనే ఉంటాయి. ఇప్పుడు ఆసక్తికరమైన విషయం ఏమిటంటే.. మమ్ముట్టీని ఒక తెలుగు సినిమాలో నటింపజేసే యత్నాలు సాగుతున్నాయేది. అది కూడా మరే సినిమాలోనో కాదు.. ప్రస్తుతం సెట్స్ మీద ఉన్న క్రేజీ ప్రాజెక్ట్ పవన్ కల్యాణ్- త్రివిక్రమ్ సినిమాలో మమ్ముట్టీని నటింపజేసే యత్నాలు సాగుతున్నాయని సమాచారం.


ఇందులో పవన్ కల్యాణ్ మామ పాత్ర కోసం మమ్ముట్టీని అనుకుంటున్నాడట త్రివిక్రమ్. ఈ పాత్ర కోసం ఇప్పటికే చాలా మందిని పరిగణనలోకి తీసుకున్నాడు ఈ దర్శకుడు. కన్నడ సూపర్ స్టార్ ఉపేంద్ర ను కూడా పరిగణనలోకి తీసుకున్నారు. అయితే మమ్ముట్టీ అయితేనే బెస్ట్ అని త్రివిక్రమ్ ఫిక్స్ అయ్యాడట. ప్రస్తుతం ఆ మలయాళీ స్టార్ హీరోను సంప్రదించే పనిలో ఉన్నారని తెలుస్తోంది. అల్లాటప్పా పాత్ర అయితే మమ్ముట్టీ చేయడానికి ఒప్పుకోకపోవచ్చు. ప్రాధాన్యత ఉన్న, విభిన్నమైన పాత్ర అయితే కాదనకపోవచ్చు.

మరి పవన్ కల్యాణ్ సినిమాలో మమ్ముట్టీ నటిస్తే అది మరింత ఆసక్తిని రేపే విషయం అవుతుంది. అలాగే సినిమాను మలయాళంలో కూడా గ్రాండ్ గా రిలీజ్ చేయడానికి అవకాశం ఏర్పడుతుంది. ఇటీవలే ‘జనతా గ్యారేజ్’ వంటి తెలుగు సినిమాలో మోహన్ లాల్ ఒక ప్రధాన పాత్రను చేశారు. ఆ సినిమాను మలయాళంలో కూడా భారీ ఎత్తున విడుదల చేశారు.