Manchu Manoj: శివుని ఆజ్ఞ.. మౌనికారెడ్డి కొడుకు బాధ్యత తీసుకున్న మంచు మనోజ్!

మాటలకు అందని భావాలను వ్యక్తపరచడానికి ఒక్క ఫొటో చాలు. కొన్ని ఫొటోలకు క్యాప్షన్లు అవసరం లేదు. అందులో ఉన్న దృశ్యాలే మనతో మాట్లాడతాయి. ఆ ఫొటో వెనకున్న భావాన్ని మనకు చెబుతాయి. తాజాగా హీరో మంచు మనోజ్ (Manchu Manoj) ట్వీట్ చేసిన ఫొటోలో కూడా ఆయన మనసులోని మాటను వ్యక్తపరుస్తోంది.మంచు మనోజ్ నిన్న భూమా మౌనికారెడ్డిని (Bhuma Mounika Reddy) వివాహం చేసుకున్న సంగతి తెలిసిందే. కుటుంబ సభ్యులు, బంధుమిత్రులు, సన్నిహితుల సమక్షంలో మనోజ్, మౌనిక పెళ్లిబంధంతో ఒక్కటయ్యారు. ఇది వీరిద్దరికీ రెండో వివాహం. మనోజ్ గతంలో ప్రణతిరెడ్డిని వివాహం చేసుకుని 2019లో ఆమె నుంచి విడాకులు తీసుకున్నారు. మౌనికారెడ్డికి సైతం 2016లో బెంగళూరుకు చెందిన గణేష్ రెడ్డితో పెళ్లయ్యింది. వీరికి కుమారుడు ధైరవ్ రెడ్డి జన్మించాడు. అయితే, మనస్పర్థలతో వీరిద్దరూ విడిపోయారు. ధైరవ్ మాత్రం తల్లి వద్దే ఉంటున్నాడు.

ఇదిలా ఉంటే, మంచు మనోజ్ ఈరోజు సాయంత్రం ఒక ఫొటోను ట్వీట్ చేశారు. ఈ ఫొటోలో మౌనిక రెండు చేతులను తన రెండు చేతులతో పట్టుకున్నారు. ఆ చేతులను ముద్దుముద్దుగా ఉండే మరో రెండు చేతులు పట్టుకున్నాయి. ఈ ఫొటోకు ‘శివుని ఆజ్ఞ’ అని క్యాప్షన్ పెట్టారు మనోజ్. అంటే, శివుని ఆజ్ఞతో మౌనికారెడ్డిని పెళ్లిచేసుకున్నారు.. అది ఓకే. కానీ, ఈ ఆజ్ఞలో మరో అంతరార్థం ఉందనిపిస్తోంది. ఆ ముద్దుముద్దు చేతులు కచ్చితంగా మౌనికారెడ్డి కొడుకు ధైరవ్‌కు కావచ్చు. అతడి బాధ్యత కూడా తానే తీసుకున్నానని మనోజ్ ఈ ఫొటో ద్వారా చెప్పారని అనిపిస్తోంది.

నిజానికి మౌనికారెడ్డికి కొడుకు ఉన్నాడన్న సంగతి చాలా మందికి తెలుసు. ధైరవ్ తల్లి వద్దే ఉంటున్నాడు కాబట్టి అతడి బాధ్యత ఎవరిది అని సోషల్ మీడియాలో కొందరు ప్రశ్నలు కూడా లేవనెత్తొచ్చు. అలాంటి ప్రశ్నలకు తావు ఇవ్వకుండా ముందుగానే మనోజ్ ఈ ట్వీట్ చేశారని అనిపిస్తోంది. మొత్తానికి తన ఇష్టదైవం ముక్కంటి సాక్షిగా మూడో చేయిని కూడా పట్టుకున్నారు మంచు మనోజ్.

శుక్రవారం రాత్రి ఫిలింనగర్‌లోని మంచు లక్ష్మి నివాసంలో జరిగిన మనోజ్-మౌనిక పెళ్లి వేడుకలో మోహన్ బాబు, మంచు విష్ణు, విరానికాతో పాటు భూమా కుటుంబ సభ్యులు, పలువురు సినీ ప్రముఖులు హాజరయ్యారు. సింగర్ సునీత, రామ్ దంపతులతో పాటు నరేష్, పవిత్ర జంట కూడా ఈ వివాహ వేడుకలో పాల్గొంది. వీరందరి సమక్షంలో రాత్రి 8.30 గంటల సమయంలో మౌనిక మెడలో మూడుళ్లు వేశారు మంచు మనోజ్.