Mani Ratnam : రాజ‌మౌళికి థాంక్స్‌.. బాహుబ‌లి వ‌ల్లే ‘పొన్నియిన్ సెల్వ‌న్’ తీయ‌గ‌లిగాను : మ‌ణిర‌త్నం

ద‌క్షిణాది సినిమాను స‌రికొత్తగా బాలీవుడ్ ప్రేక్ష‌కులు సైతం మెచ్చేలా తెర‌కెక్కించిన దర్శ‌కుల్లో మ‌ణిర‌త్నం (Mani Ratnam) ఒక‌రు. అలాంటి సీనియ‌ర్ డైరెక్ట‌ర్ సైతం ద‌ర్శ‌క ధీరుడు రాజ‌మౌళి (Rajamouli)ని పొగ‌డ్త‌ల‌తో ముంచెత్తారు. అందుకు కార‌ణం.. జ‌క్క‌న్న తెర‌కెక్కించిన బాహుబ‌లి (Baahubali) సినిమా. దీనికి మ‌ణిర‌త్నంకి ఏం సంబంధం అని అనుకుంటున్నారా!. ప్ర‌స్తుతం మ‌ణిర‌త్నం తెర‌కెక్కించిన భారీ బ‌డ్జెట్ మూవీ ‘పొన్నియన్ సెల్వన్’ (Ponniyin Selvan). ఈ సినిమా రెండు భాగాలుగా ప్రేక్ష‌కుల ముందుకు రానుంది. అందులో తొలి భాగం సెప్టెంబ‌ర్ 30న రిలీజ్ కానుంది.

‘పొన్నియిన్ సెల్వ‌న్’ చిత్రంలో ‘చోళ చోళ’ (Chola Chola Song) అనే పాటను రిలీజ్ చేశారు. ఈ సందర్భంగా మణిరత్నం మాట్లాడుతూ ‘‘చిరంజీవి గారికి (Chiranjeevi) థాంక్స్ చెప్పాలి. కానీ అది ఎందుకు అనేది చెప్పను. తరువాత మీకే తెలుస్తుంది. రాజమౌళి గారికి (Rajamouli) థాంక్స్ చెప్పాలి. ఆయన వల్లే ఇలాంటి చిత్రాలు తీయగలమనే ధైర్యం వచ్చింది. రెండు పార్టులుగా ఇలాంటి చిత్రాలు తీసి మెప్పించవచ్చని నిరూపించారు. అందుకే ఆయనకు థాంక్స్. నా బిడ్డ లాంటి ఈ చిత్రం ఇక దిల్ రాజు గారిదే (Dil Raju). ఆయనే తెలుగులో ఈ సినిమాను చూసుకోవాలి. తనికెళ్ల భరణి గారికి థాంక్స్. చిత్రం కోసం పని చేసిన ప్రతీ ఒక్కరికీ థాంక్స్. ఈ సినిమాను తీయడం మాకు ఎంతో గర్వంగా ఉంది. ఈ చిత్రాన్ని అందరూ ఎంజాయ్ చేస్తారని ఆశిస్తున్నాను’’ అని అన్నారు.

తమిళ్‌, హిందీ, తెలుగు, కన్నడ, మలయాళంలో ‘పొన్నియిన్ సెల్వన్’ సినిమాను ఏక సమయంలో విడుదల చేయనున్నారు. విక్రమ్‌ (Vikram), జయం రవి (Jayam Ravi), కార్తి (Karthi), ఐశ్వర్య రాయ్‌ బచ్చన్‌, త్రిష, ఐశ్వర్య లక్ష్మి, శరత్‌కుమార్‌, విక్రమ్‌ ప్రభు, శోభిత ధూళిపాళ, జయరామ్‌, ప్రభు, పార్తిబన్‌, ప్రకాష్‌రాజ్‌ కీలక పాత్రల్లో నటిస్తున్న సినిమా ఇది.