నలుగురు స్టార్ హీరోలతో మణిరత్నం ‘నవాబ్’

ప్రముఖ దర్శకుడు మణిరత్నం మరోసారి మల్టీస్టారర్ మూవీకి శ్రీకారం చుట్టాడు. ‘చెక్క చివంత వానమ్’ పేరిట నలుగురు హీరోలతో సినిమాను తెరకెక్కిస్తున్నట్లు అధికారికంగా ప్రకటించారు. శుక్రవారం ఈ చిత్రానికి సంబంధించిన పోస్టర్‌ను విడుదల చేశారు. అరవింద్ స్వామి, శింబు, అరుణ్ విజయ్, విజయ్ సేతుపతిలు ఈ సినిమాలో నటిస్తున్నారు. జ్యోతిక, జయసుధ, ప్రకాశ్ రాజ్ కీలక పాత్రలు పోషిస్తున్నారు. తెలుగులో ఈ సినిమాకు నవాబ్ అనే టైటిల్ పెట్టారు. ఈ సినిమా షూటింగ్ ఫిబ్రవరి 12 నుంచి ప్రారంభం కానుంది.

అరవింద్ స్వామి, అరుణ్ విజయ్, శింబు ఈ సినిమాలో అన్నదమ్ముళ్లుగా కనిపించబోతున్నట్లు సమాచారం. వీరు గ్యాంగ్‌స్టర్లు కాగా, విజయ్ సేతుపతి పోలీస్ ఆఫీసర్ పాత్రలో నటించనున్నారని తెలుస్తోంది. పద్మావత్‌లో నటించి అదితి రావ్ కూడా ఈ సినిమాలో నటించనున్నారు.

చెక్క చివంత వానమ్ అంటే ఆకాశం ఎర్రబడింది అని అర్థం కాగా.. ఈ సినిమా పారిశ్రామిక కాలుష్యం నేపథ్యంలో తెరకెక్కనుందనే వార్తలు వెలువడుతున్నాయి. సినిమా పోస్టర్ కూడా ఈ రూమర్లకు బలం చేకూర్చేదిగా ఉంది. లైకా ప్రొడక్షన్స్ నిర్మిస్తోన్న ఈ సినిమాకు ఏఆర్ రెహ్మాన్ సంగీతం అందించనున్నాడు.