తెలుగులో రీమేక్ అవుతోన్న 'సైరాట్'

చిన్న సినిమాగా విడుదలై మరాఠీ సినీ ఇండస్ట్రీలో సంచలన విజయం సాధించిన సినిమా 'సైరాట్'. ఇప్పుడు ఈ సినిమాను తెలుగులో రీమేక్ చేసే ప్రయత్నాలు జరుగుతున్నాయి. ఇటీవలే 'శ్రీరస్తు .. శుభమస్తు' సినిమాతో హిట్ కొట్టిన దర్శకుడు పరుశురాం ఈ సినిమాను తెలుగులో తెరకెక్కిస్తారని చెప్తున్నారు. అయితే ప్రస్తుతం పరుశురాం గీతా ఆర్ట్స్ బ్యానర్ లోనే మరో సినిమాకు కమిట్ అయ్యాడు. 'సైరాట్' తెలుగు రీమేక్ హక్కులను మరో నిర్మాణ సంస్థ తీసుకుంది. ఈ నేపథ్యంలో తెలుగులో ఈ సినిమాను ఎవరు తెరకెక్కిస్తారు. నటీనటులు ఎవర్ని తీసుకుంటారనేది త్వరలో తెలుస్తుంది.


కాగా, ఆకాశ్ తోషర్ రింకూ రాజ్ గురు జంటగా నాగరాజ్ మంజులే దర్శకత్వంలో రూ. 5 కోట్ల బడ్జెట్ తో మరాఠీలో నిర్మితమైన సైరాట్ సినిమా దాదాపు రూ. 80 కోట్లకు పైగానే కలెక్షన్లు సాధించి మిగతా భారతీయ చిత్రసీమలకు సవాల్ విసిరింది. మరాఠి సినీ పరిశ్రమ చరిత్రలో ఇదొక రికార్డ్. వేర్వేరు కులాలకు చెందిన ఓ అమ్మాయి, అబ్బాయికి మధ్య జరిగిన లవ్ స్టోరీని ఈ సినిమాలో అద్భుతంగా చూపించారు. కులాల పేరుతో గొడవలు జరుగుతున్న ప్రస్తుత సమాజంలోని సున్నితమైన అంశాలను ప్రేమతో జోడించి చూపించారు.