Me Too: టీఆర్ఎస్ ఎమ్మెల్యే లైంగికంగా వేధించాడు.. శ్రీరెడ్డి

టాలీవుడ్‌లో క్యాస్టింగ్ కౌచ్‌పై మీడియా ముందుకొచ్చి సంచలన ఆరోపణలు చేయడమే కాదు, ఫిల్మ్ చాంబర్ ఎదుట అర్థనగ్న ప్రదర్శన చేసిన నటి శ్రీరెడ్డి పేరు జాతీయస్థాయిలోనూ అప్పట్లో మార్మోగిపోయింది. శ్రీరెడ్డి వ్యాఖ్యలతో టాలీవుడ్‌తోపాటు కోలీవుడ్‌లోనూ ప్రకంపనలు రేగాయి. ప్రస్తుతం మీటూ ఉద్యమం ఊపందుకోవడంతో తాజాగా శ్రీరెడ్డి మరో బాంబ్ పేల్చింది. దేశంలో మీటూ ఉద్యమం ప్రకంపనలు కొనసాగుతున్నా.. తెలుగు చలనచిత్ర పరిశ్రమలో అలాంటి ఆరోపణలు ఇంకా బయటకు రాలేదని భావిస్తున్న వేళ ఆమె చేసిన వ్యాఖ్యలు చర్చనీయాంశమయ్యాయి. టాలీవుడ్‌తోపాటు తెలుగు రాజకీయాలను కుదిపేసేలా ఆమె ఆరోపణలు గుప్పించింది. ఓ తమిళ టీవీకి ఇచ్చిన ఇంటర్వ్యూలో ఆమె చేసిన వ్యాఖ్యలు ప్రస్తుతం సోషల్ మీడియాలో హల్‌చల్ చేస్తున్నారు. అధికార టీఆర్‌ఎస్ పార్టీకి చెందిన ఓ ఎమ్మెల్యే తనను వేధించాడని శ్రీరెడ్డి సంచలన ఆరోపణలు చేసింది.

ఆ ఎమ్మెల్యే తనను లైంగికంగా వేధించాడని తెలిపిన ఆమె, హోటల్ పార్క్ హయత్‌లో ఆయన కలిశాడని శ్రీరెడ్డి తెలిపింది. టాలీవుడ్‌లో తాను స్లీపింగ్ ప్రొడ్యూసర్‌నని, చాలా సినిమాల్లో పెట్టుబడి (బ్లాక్ మనీ) పెట్టానని ఎమ్మెల్యే చెప్పినట్టు పేర్కొంది. అంతేకాదు, రాంచరణ్, ప్రభాస్ లాంటి వారు కూడా తాను ఏదైనా చెబితే వెంటనే చేస్తారని అతడు తనతో అన్నట్లు శ్రీరెడ్డి చెప్పుకొచ్చింది. తమ పార్టీ అధికారంలో ఉందని, తాము చెప్పినట్టే అందరూ వింటారని, తన కోరిక తీర్చాలని వేధించినట్లు వెల్లడించింది.

చాలాసార్లు తనను వేధించాడని అయితే, ‘తాను పతివ్రతనూ, పడుకోలేదని చెప్పను. కానీ, ఆ సమయంలో నేను సౌకర్యంగా లేను. పైగా రాజకీయ నేతలను నమ్మలేం. నా స్నేహితులను చాలా మందిని ఆయన వేధించాడు. వాళ్లను పార్క్ హయత్‌కు రప్పించుకున్నాడు. అతడి వెనుక మరి కొంత మంది కూడా ఉన్నారు. అయితే వారి గురించి నాకు పూర్తిగా తెలియదు’ అని శ్రీరెడ్డి చెప్పింది. ఇందులో బడా నిర్మాత బెల్లంకొండ సురేశ్‌ కూడా ఉన్నట్లు బాంబ్ పేల్చింది.