MeToo అమీర్, అక్షయ్‌కి ‘అమ్మ’ మద్దతు..!

దేశంలో #మీటూ ఉద్యమానికి మద్దతుగా తాము నటిస్తున్న సినిమాల నుంచి పక్కకి తప్పుకున్న బాలీవుడ్ హీరోలు అమీర్ ఖాన్, అక్షయ్ కుమార్‌లకి మలయాళం మూవీ ఆర్టిస్ట్స్ అసోషియేషన్‌ (అమ్మ) మద్దతు ప్రకటించింది. ఇటీవల ‘అమ్మ’ సెక్రటరీ సిద్ధిఖ్ మీడియా సమావేశంలో మాట్లాడుతూ అమీర్ ఖాన్, అక్షయ్ కుమార్‌లపై విమర్శలు గుప్పించగా.. ఆ మాటలపై తాజాగా విచారం వ్యక్తం చేసిన ‘అమ్మ’ అధికార ప్రతినిధి జగదీశ్ ఆ ఇద్దరికీ అసోషియేషన్ పూర్తి స్థాయిలో మద్దతు తెలుపుతున్నట్లు స్పష్టం చేశాడు.

సుభాష్ కపూర్‌ దర్శకత్వంలో ‘మొఘల్’ సినిమాలో నటించేందుకు అంగీకారం తెలిపిన అమీర్ ఖాన్.. తాజాగా సుభాష్‌పై ఓ బాధితురాలు లైంగిక ఆరోపణలు చేయడంతో ఆ సినిమా నుంచి తప్పుకున్నాడు. మరోవైపు సాజిద్ ఖాన్ దర్శకత్వంలో ‘హౌస్‌ఫుల్ 4’ సినిమాలో నటిస్తున్న అక్షయ్ కుమార్.. కొంత మంది మహిళలు సాజిద్ తమని లైంగికంగా వేధించాడంటూ గళం విప్పడంతో ఆ సినిమా షూటింగ్‌ని తాత్కాలికంగా నిలిపివేశాడు. దీంతో.. ఈ ఇద్దరికీ ‘అమ్మ’ మద్దతు తెలుపుతోందని వెల్లడించిన జగదీశ్.. సెక్రటరీ సిద్ధిఖ్ అసోషియేషన్‌ అనుమతి లేకుండా మీడియాతో మాట్లాడిందని వివరణ ఇచ్చే ప్రయత్నం చేశాడు.