రామోజీ రావు అభినందనకి కళ్లలో నీళ్లు తిరిగాయి -మోహన్ బాబు

600లకు పైగా చిత్రాల్లో నాయకుడు, ప్రతి నాయకుడు, నిర్మాతగా ఇలా అన్ని విభాగాల్లో తనదైన ప్రత్యేకతను చాటుకున్న కలెక్షన్ కింగ్ డా.మోహన్ బాబు నట జీవితంలో నాలుగు దశాబ్దాలను పూర్తి చేసుకున్న సంగతి తెలిసిందే. ఈ సందర్భంగా బ్రిటన్ పార్లమెంట్‌లో మోహన్ బాబు సినిమాల్లో బెస్ట్ డైలాగ్స్‌తో రీసెంట్‌గా బెస్ట్ డైలాగ్స్ అనే పుస్తకాన్ని విడుదల చేశారు. ఈ సందర్భాన్ని పురస్కరించుకుని మీడియా మొఘల్ రామోజీరావు మోహన్ బాబును ప్రశంసిస్తూ ఓ లేఖను పంపించారు. డైలాగ్ కింగ్‌గా తెలుగు ప్రేక్షకుల మనసులు గెలుచుకున్న హీరో నిజజీవింతంలోనూ హీరో అనదగ్గ వ్యక్తిత్వాన్ని కలిగి ఉన్నారు. మీరింకా మరెన్నో గౌరవాలను పొందాలని కోరుకుంటున్నాని ఆయన ఈ లేఖలో తన ఆకాంక్షని వ్యక్తపరిచారు.

రామోజీరావు వంటి వ్యక్తి నుండి ఇటువంటి ప్రశంసలు అందుకోవడంతో మోహన్ బాబు కూడా చాలా హ్యాపీగా ఫీలయ్యారు. రామోజీరావు గారు నాకు ఇన్‌స్పిరేషన్, ఆయనలాంటి వ్యక్తి నన్ను రియల్ హీరో అనడంతో కళ్ళలో నీళ్ళు తిరిగాయి. ఆయన ప్రశంసలను మరచిపోలేను. జీవితంలో ఇంకా ఎన్నెన్నో సాధించాలనుకుంటున్నానని ట్విటర్‌లో తెలియజేసిన మోహన్ బాబు ఈ సందర్భంగా డైలాగ్ బుక్‌కు ముందు మాట రాసిన నందమూరి బాలకృష్ణకు ప్రత్యేక ధన్యవాదాలను కూడా తెలియజేశారు.