Chiranjeevi Birthday: నా అన్నను, తమ్ముడి ఏమైనా అంటే తాట తీస్తా.. నాగబాబు మాస్ వార్నింగ్

మెగాస్టార్ చిరంజీవి (Megastar Chiranjeevi) బర్త్ డే ఈవెంట్ హైదరాబాద్ హైటెక్స్‌లో గ్రాండ్‌గా జరిగింది. మెగాస్టార్ కార్నివాల్ పేరుతో జరిగిన ఈ ఈవెంట్‌కు మెగా హీరోలతో పాటు అభిమానులు భారీగా హాజరయ్యారు. ఈ సందర్భంగా మెగా బ్రదర్ నాగబాబు (Nagababu) ఎమోషనల్ స్పీచ్ ఇచ్చారు. చిరంజీవిని, పవన్ కళ్యాణ్‌ను ఎవరైనా విమర్శిస్తే.. తాట తీస్తా అంటూ హెచ్చరించారు. ఎన్నో ఆసక్తికర విషయాలను నాగబాబు పంచుకున్నారు. ఆయన మాటల్లోనే..

'1976లో తను 21 సంవత్సరాల కుర్రవాడు. తనకంటూ ఇండస్ట్రీలో తన ముద్ర వేయాలని.. తనకంటూ గుర్తింపు ఉండాలని నెల్లూరు నుంచి హైదరాబాద్‌కు వచ్చి ఈ రోజు మహా సామ్రాజ్యాన్ని స్థాపించడం మాములు విషయం కాదు. మా ఇద్దరిది 62 ఏళ్ల అనుబంధం. మా అన్నయ్య గురించి నాకంటే ఇండస్ట్రీలో ఎక్కువగా చెప్పేవారు లేరు. మా అన్నయ్య బర్త్ డే అంటే ఇంట్లో ఎంతో స్పెషల్ డే. మా అమ్మ చిరంజీవి గారి పుట్టినరోజును ఎప్పుడు ప్రత్యేకంగా చేసేవారు. అన్నయ్య ఇప్పుడు అందరికీ హీరో కావచ్చు. కానీ నాకు చిన్నప్పటి నుంచే హీరో. ఆయనకు చిన్నప్పటి నుంచి ఫాలోయింగ్ ఉంది.

ఆయన సామ్రాజ్యం ఎంతలా విస్తరించిందంటే.. ఒక తమ్ముడికి నిర్మాతగా జీవితాన్ని ఇచ్చి నిలబెట్టాడు.. అది నేను. ఇంకొక తమ్ముడు పవన్ కళ్యాణ్. అతను నిరంతరం ఆలోచనవాది. పవన్ కళ్యాణ్ డైరెక్టర్‌ అవుదామని అనుకున్నాడు. అయితే 'దర్శకత్వం తరువాత చేయొచ్చు.. నీలో స్పార్క్ ఉంది.. నువ్వు ముందు హీరో అవ్వు..' అని అన్నయ్య కళ్యాణ్ బాబుతో చెప్పారు. అన్నయ్య మాటను ఒప్పుకుని ఇవాళ పవర్ స్టార్‌గా మీ అందరి ముందుకు వచ్చాడు. రాజకీయ చైతన్యం తీసుకువచ్చిన వ్యక్తి జనసేనాని. త్వరలో ఆంధ్రప్రదేశ్ ముఖ చరిత్రను మార్చే దమ్మున్న వ్యక్తి. అంతగొప్ప వ్యక్తిని ఆంధ్ర రాష్ట్రానికి ఇచ్చిన వ్యక్తి మెగాస్టార్ చిరంజీవి.

బన్నీ, చరణ్, వరుణ్, సాయి ధరమ్ తేజ్, వైష్టవ్, నిహారిక, శిరీష్ వీరందరి బంగారు భవిష్యత్ ఇచ్చాడు. మా అన్నయ్య రుణం తీర్చుకోలేం. అతను ఎంత మంచి వాడో నాకు తెలుసు. అయినా కొంతమంది విమర్శిస్తుంటారు. మా అన్నయ్యను, పవన్ కళ్యాణ్‌ను ఎవరు విమర్శించినా నేను గట్టిగా కౌంటర్ ఇస్తాను. అందుకు నన్ను కంట్రావర్సీయల్ పర్సన్ అంటున్నారు. మీరు ఏమనుకున్నా పర్లేదు.. నా అన్నను.. తమ్ముడిని ఎవడైనా ఏదైనా తాటతీస్తా.. అందులో ఏ డౌట్ లేదు..' అంటూ నాగబాబు మాస్ వార్నింగ్ ఇచ్చారు. అనంతరం చిరంజీవి జీవితంలో జరిగిన కొన్ని సంఘటలను ఆయన అభిమానులతో పంచుకున్నారు.