God Father First Review: గాడ్ ఫాదర్‌ మూవీకి బ్యాడ్ రివ్యూ.. రివ్యూవర్‌ను ఏకిపారేస్తున్న ఫ్యాన్స్

తనకు తాను ఓవర్సీస్ సెన్సార్ బోర్డ్‌గా చెప్పుకుంటూ.. ఫేక్ రివ్యూలు ఇస్తూ సోషల్ మీడియాలో అందరిచేత తిట్లు తినే ఉమైర్ సంధు (Umair Sandhu) తెలుసు కదా..! ఇతగాడు అందరీ కంటే ముందే సినిమాలు చూశానని.. టీజర్లు చూశానని చెప్పుకుంటూ ట్విట్టర్‌లో రివ్యూలు ఇస్తుంటాడు. ఇలా ఫేక్ ట్వీట్స్‌తోనే సోషల్ మీడియాలో బాగా పాపులర్ అయ్యాడు. ‘ఆచార్య’, ‘రాధేశ్యామ్’, ‘కాటమరాయుడు’, ‘అజ్ఞాతవాసి’, ‘స్పైడర్’, ‘సాహో’, ‘నాపేరు సూర్య’, ‘బీస్ట్’ వంటి సినిమాలను తాను ముందే చూశానంటూ నాలుగు స్టార్లు రేటింగ్ ఇచ్చి నాలుక కరుచుకున్నాడు.

తాజాగా మెగాస్టార్ చిరంజీవి (Chiranjeevi) హీరోగా నటించిన గాడ్ ఫాదర్ (God Father) మూవీకి కూడా మనోడు అప్పుడే రివ్యూ ఇచ్చేశాడు. 'సెన్సార్ బోర్డ్ నుంచి గాడ్ ఫాదర్ ఫస్ట్ రివ్యూ.. బి, సి క్లాస్ మాస్‌ల కోసం తీసిన యావరేజ్ మూవీ. కొత్త సీసాలో పాత వైన్..! చిరంజీవి మీకు విశ్రాంతి తీసుకోండి ప్లీజ్..' అంటూ రాసుకొచ్చాడు. 'చిరంజీవికి సాలిడ్ స్క్రిప్ట్స్ కావాలి. దయచేసి ఇలాంటి హీరోయిజం, మాస్ రకమైన పాత్రల నుంచి బయటపడండి. తెలివితక్కువ స్క్రిప్ట్‌లలో మీ టాలెంట్‌ను వృథా చేసుకోకండి.. మీరు మెగా స్టార్.. కానీ స్క్రిప్ట్ ఎంపిక బాగాలేదు. గాడ్ ఫాదర్ మూవీ యావరేజ్.' అంటూ మరో ట్వీట్ పోస్ట్ పోశాడు.


దీంతో మెగాస్టార్ ఫ్యాన్స్ రంగంలోకి దిగారు. బండ బూతులతో ఉమైర్ సంధుపై విరుచుకుపడుతున్నారు. 'సందులో పంది.. బురదలో ఉంది' అంటూ తిట్టేస్తున్నారు. 'మొన్న ఇలానే కాదరా.. ఆదిపురుష్ టీజర్ ముందే చూశానని.. అదిరిపోయింది.. బ్లాక్‌బస్టర్ అన్నావు.. తీరా చూస్తే ఏమైంది. ఫేక్ రివ్యూలు ఆపేయ్ ఇక..' అంటూ సలహాలు ఇస్తున్నారు. 'మెగాస్టార్‌కి సలహాలు ఇవ్వడానికి మీకు ఆ అనుభవం లేదు బ్రదర్.. మీరు ఇంకా ఎదగాలి' అని అంటున్నారు. 'వీడో పెద్ద ఫేక్.. ఎవరు నమ్మొద్దు. నోటికి వచ్చినట్లు రివ్యూలు ఇస్తాడు..' అంటూ కామెంట్స్ పెడుతున్నారు.

పొలిటికల్ బ్యాక్ డ్రాప్‌లో వస్తున్న 'గాడ్ ఫాదర్' సినిమాపై అభిమానులు భారీగా ఆశలు పెట్టుకున్నారు. ఆచార్య మూవీ డిజాస్టర్ తరువాత మెగాస్టార్ బ్లాక్‌బస్టర్ హిట్ కోసం వాళ్లు ఎదురుచూస్తున్నారు. 'గాడ్ ఫాదర్'తో ఆ లోటు తీరుందని గట్టి నమ్మకంతో ఉన్నారు. అక్టోబర్ 5న ఆడియన్స్ ముందుకు రానుంది. ఇంకా రిలీజ్ కాకముందే సెన్సార్ బోర్డు రివ్యూ అంటూ ఉమైర్ సంధు ఓ ఫేక్ రివ్యూ ఇచ్చి నెగిటివ్ ప్రచారానికి తెరలేపాడు. దీంతో అభిమానులు తీవ్ర ఆగ్రహం వ్యక్తం చేస్తున్నారు.