Sye Raa: చిరంజీవి బయోపిక్.. అన్న చేయనంటే తమ్ముడు రెడీ

ఆ మధ్య తెలుగు ఇండస్ట్రీతో పాటు.. మిగతా ఇండస్ట్రీలలోనూ బయోపిక్స్ హవా నడిచింది. క్రీడాకారులు, రాజకీయ నాయకులు, ప్రముఖ సినీ వ్యక్తుల జీవితాలను తెరపై ఆవిష్కరించే ప్రయత్నిం చేశారు. చాలా వరకూ ఈ బయోపిక్స్ సక్సెస్ బాట పట్టాయి. అయితే సావిత్రి జీవిత కథ ఆధారంగా తెరకెక్కిన తెలుగు మొట్టమొదటి బయోపిక్ మూవీ ‘మహానటి’ తిరుగులేని విజయాన్ని నమోదు చేయడంతో ట్రెండ్ సెట్టర్‌గా నిలిచింది.

ఈ సినిమా ప్రేరణతో వరుసగా బయోపిక్స్ వచ్చాయి. ఎన్టీఆర్ జీవిత కథ ఆధారంగా రెండు సినిమాలు వచ్చాయి. ఎన్టీఆర్ కథానాయకుడు, ఎన్టీఆర్ మహానాయకుడు రెండు చిత్రాలు బాక్సాఫీస్ వద్ద బోల్తాకొట్టాయి. అలాగే వైఎస్ రాజశేఖర్ రెడ్డి జీవిత చరిత్ర ఆధారంగా ఆయన పాదయాత్రను బేస్ చేసుకుని ‘యాత్ర’ సినిమాను రూపొందించారు. ఈ సినిమాకు విమర్శకుల ప్రశంసలు దక్కినప్పటికీ ఊహించిన స్థాయి విజయాన్ని నమోదు చేయలేకపోయింది.

Read Also: 'సైరా' ట్రైలర్ రికార్డ్.. చిరు సత్తా ఇది

దీంతో ఒకప్పుడు బయోపిక్ అంటే తెగ ఉత్సాహం చూపించే దర్శకుడు.. ఇప్పుడు ఆలోచనలో పడ్డారు. అయినప్పటికీ ప్రస్తుతం గోపీచంద్ బయోపిక్‌తో పాటు.. కె. విశ్వనాధ్ బయోపిక్‌లు లైన్‌లో ఉన్నాయి. వీటితో పాటుగా మెగాస్టార్ చిరంజీవి బయోపిక్ ఆలోచనలు కూడా మన దర్శకుల్లో మొదలయ్యాయి.

ఇంతకీ మెగాస్టార్ బయోపిక్ సినిమా తీస్తే.. చిరంజీవి పాత్రను ఎవరు చేస్తే బాగుంటుంది? ఆయన తనయుడు రామ్ చరణ్ ఉండనే ఉన్నారు కాబట్టి తండ్రి పాత్రను చేసేందుకు రామ్ చరణ్ రెడీగానే ఉన్నారా? లేదంటే అల్లు అర్జున్, వరుణ్ తేజ్, సాయి ధరమ్ తేజ్‌ ఇలా మెగాహీరోల్లో ఎవరో ఒకరు ఈ మెగా బయోపిక్‌కి రెడీగా ఉన్నారా? లేదంటే.. పవర్ స్టార్ పవన్ కళ్యాణ్ అన్న మెగాస్టార్ బయోపిక్‌తో రీ ఎంట్రీ ఇవ్వబోతున్నారా? అనే చర్చ ఇండస్ట్రీ వర్గాల్లో మొదలైంది.

అయితే ఇదే విషయంపై మెగా ప్రిన్స్ వరుణ్ తేజ్ ఓపెన్ అయ్యారు. తన మనసులో ఉన్న కోరికను బయటపెట్టారు. ప్రస్తుతం వరుణ్ తేజ్ ‘వాల్మీకి’ చిత్రం విడుదలకు రెడీగా ఉంది. హరీష్ శంకర్ దర్శకత్వం వహించిన ఈ చిత్రం ఈనెల 20న ప్రేక్షకుల ముందుకు రానుంది. ఈ మూవీ ప్రమోషన్ ప్రెస్ మీట్‌లో మెగాస్టార్ బయోపిక్ చిత్రానికి సంబంధించి ఆసక్తికరమైన కామెంట్స్ చేశారు వరుణ్ తేజ్.

‘చిరంజీవి గారి బయోపిక్‌ తీస్తే మీరు చేస్తారా’ అన్న ప్రశ్నకు సమాధానంగా.. ‘హరీష్‌ ఈ మధ్య ఒకసారి చిరంజీవి గారి బయోపిక్‌ తీస్తాను అని అన్నారు. అయితే ఆ రోల్‌ నా కన్నా చరణ్‌ అన్న చేస్తే బాగుంటుంది. ఆయన చేయకపోతే సెకండ్‌ ఛాయిన్ నేనే. తప్పకుండా చేస్తాను. ఎట్టి పరిస్థితిల్లోనూ వదలుకోను’ అంటూ చిరంజీవి పాత్ర పోషించాలనే మనసులో కోరికను బయటపెట్టారు వరుణ్ తేజ్. చూడాలి మరి.. చిరంజీవి బయోపిక్‌‌లో మెగాస్టార్ అనిపించుకునేదెవరో. సర్లే.. ఆయన బయోపిక్ వస్తుందో లేదో తరువాత సంగతి కాని.. ప్రస్తుతం చిరంజీవి నటించిన ఉయ్యాలవాడ నరసింహారెడ్డి బయోపిక్ మూవీ ‘సైరా’ ట్రైలర్ నేడే విడుదలైంది ఆ ట్రైలర్‌పై ఓ లుక్కేయండి.