Sye Raa First Day Total Collection: ‘సైరా’ బాక్సాఫీస్ బాదుడు.. తొలిరోజు టోటల్ రూ. 85 కోట్లు!

‘కొడితే కొట్టాలిరా సిక్స్ కొట్టాలి.. ఆడితే ఆడాలిరా రఫ్ ఆడాలీ’.. మెగాస్టార్ పాటే కాదు.. ఆయన సినిమా ‘సైరా’ థియేటర్స్‌లో తొలి ఆడపడింది మొదలు బాక్సాఫీస్ వద్ద సిక్స్‌ల మోతం మోగిస్తోంది. కోట్ల వర్షం కురిపిస్తుంది. ఇదీ మెగాస్టార్ సత్తా అని ప్రపంచానికి తెలియజేస్తుంది.

రామ్ చరణ్ నిర్మాణంలో మెగాస్టార్ చిరంజీవి నటించిన చారిత్రాత్మక మూవీ ‘సైరా నరసింహారెడ్డి’ భారీ అంచనాల నడుమ గాంధీ జయంతి సందర్భంగా అక్టోబర్ 2న విడుదలై బ్లాక్ బస్టర్ హిట్‌గా నిలిచింది. సుమారు 270 కోట్ల భారీ బడ్జెట్‌తో ప్యాన్ ఇండియా మూవీగా తెలుగు, తమిళ, కన్నడ, మలయాళం, హిందీ భాషల్లో విడుదలైన ఈ సినిమా తొలి ఆట నుండే రికార్డుల వేట మొదలుపెట్టింది.

తొలిరోజు రఫ్‌గా ఓ 50 కోట్లు కలెక్ట్ చేయవచ్చని మార్కెట్ అనలిస్ట్‌లు అంచనా వేసినప్పటికీ వీటిన్నింటినీ దాటి తొలిరోజు ప్రపంచ వ్యాప్తంగా రూ.85 కోట్లు రాబట్టినట్టు తెలుస్తోంది. రెండు తెలుగు రాష్ట్రాల్లోనే 37.60 కోట్లు షేర్ రాబట్టి మెగాస్టార్ స్టామినాను మరోసారి ప్రపంచానికి తెలియజెప్పింది. తొలిరోజు బ్లాక్ బస్టర్ హిట్ టాక్ రావడంతో రెండోరోజు మరింత ఆక్యుపెన్సీ పెంచుకుని కలెక్షన్లు ఊపందుకున్నాయి. ప్రస్తుతం థియేటర్స్‌లో ‘సైరా’కు పోటీగా మరే ఇతర సినిమా లేకపోవడంతో ‘సైరా’ వార్ వన్‌సైడ్ అయ్యింది.

ఓవర్‌సీస్‌లోనూ సైరా జోరు కొనసాగుతోంది. ప్రీమియర్ షోస్ ద్వారా అమెరికాలో 8, 17, 000 డాలర్లు, కెనడాలో 40, 000 డాలర్లు రాబట్టింది. ఈ సందర్భంగా నార్త్ అమెరికాలో సైరా మిలియన్ డాలర్ల క్లబ్‌లో చేరింది. సైరా జోరు చూస్తుంటే మరిన్ని రికార్డ్‌లను బ్రేక్ చేయడం ఖాయంగానే కనిపిస్తోంది.