Ram Charan ఫస్ట్ బాలయ్య సినిమానే చూస్తాడేమో? మేము ఆ టైప్ కాదు: చిరంజీవి

సంక్రాంతికి పెద్ద సినిమాల మధ్య పోటీ ఆసక్తి రేపుతోంది. నందమూరి బాలకృష్ణ (Nandamuri Balakrishna) హీరోగా నటించిన ‘వీరసింహా రెడ్డి’ (Veera Simha Reddy) మూవీ జనవరి 12న థియేటర్లలోకి వస్తోంది. ఈ సినిమాకి గోపీచంద్ మలినేని దర్శకత్వం వహించగా.. మైత్రీ మూవీ మేకర్స్ బ్యానర్‌ నిర్మించింది. హీరోయిన్ శృతి హాసన్. అలానే మెగాస్టార్ చిరంజీవి (Megastar Chiranjeevi) నటించిన ‘వాల్తేరు వీరయ్య’ (Waltair Veerayya) సినిమా కూడా జనవరి 13న రిలీజ్‌కానుంది. ఈ సినిమాని కూడా మైత్రీ మూవీ మేకర్స్ నిర్మించగా.. శృతి హాసన్ కథానాయిక. బాబీ దర్శకత్వం వహించాడు. మాస్ మహరాజా రవితేజ ఓ కీలక పాత్ర పోషించాడు. ప్రస్తుతం ఈ రెండు సినిమాల మధ్య పోటీ ఆసక్తిగా మారిపోయింది. వాల్తేరు వీరయ్య ప్రమోషన్స్‌లో భాగంగా వరుసగా ఇంటర్వ్యూలు ఇస్తున్న చిరంజీవి.. సోషల్ మీడియాలో ఫ్యాన్స్ మధ్య జరుగుతున్న రచ్చపై స్పందించారు. ఇప్పటికే రెండుగా విడిపోయిన ఇద్దరు హీరోల అభిమానులు.. సినిమాల గురించి నెగటివ్, పాజిటివ్‌గా ప్రచారం చేస్తూ ఆధిపత్యం ప్రదర్శిస్తున్నారు. దాంతో రిలీజ్ టైమ్‌కి ఈ ధోరణి సోషల్ మీడియాలో మరింత పెరిగే ప్రమాదం ఉంది. అలానే రెండు సినిమాల యూనిట్స్‌ కూడా పోటీపడి మరీ టైటిల్ లాంచ్, సాంగ్స్ రిలీజ్, టీజర్ రిలీజ్, ప్రీరిలీజ్ ఈవెంట్స్, ట్రైలర్ రిలీజ్‌లు చేశారు.

సోషల్ మీడియాలో కొందరు అభిమానులు ఒక సినిమాని పాజిటివ్ చేస్తూ.. మరొక సినిమాపై నెగటివ్ కామెంట్స్ చేస్తుండటంపై చిరంజీవి స్పందించారు. ‘మెగా ఫ్యామిలీ ఎప్పుడూ ఒకరి సినిమా పోవాలి.. మరొకరి సినిమా ఆడాలి అని కోరుకోదు. అసలు మేము ఆ టైపే కాదు. అలా ఆలోచించడం మా రక్తంలోనే లేదు’ అని స్పష్టం చేశారు. అలానే ఇటీవల అన్‌స్టాపబుల్ షోలో రామ్ చరణ్‌తో ఫోన్‌లో మాట్లాడిన నందమూరి బాలకృష్ణ ఫస్ట్ ‘వీరసింహా రెడ్డి’ మూవీని చూసి ఆ తర్వాత వాల్తేరు వీరయ్యని చూడాలని సూచించారు. దానికి రామ్ చరణ్ కూడా ‘తప్పకుండా సార్’ అని సమాధానమిచ్చాడు.

ఆ విషయాన్ని ప్రస్తావించిన చిరంజీవి.. ప్రస్తుతం అమెరికాలో ఉన్న రామ్ చరణ్.. తొలుత వీరసింహా రెడ్డి మూవీనే చూస్తాడేమో? అని సరదాగా చెప్పుకొచ్చారు. కాలిఫోర్నియాలోని ది బెవర్లీ హిల్టన్ వేదికగా జరిగిన ‘గోల్డెన్ గ్లోబ్’ అవార్డ్ పంక్షన్‌కి ఉపాసనతో కలిసి రామ్ చరణ్ హాజరయ్యాడు. జూనియర్ ఎన్టీఆర్‌తో కలిసి రామ్ చరణ్ నటించిన ఆర్ఆర్ఆర్ సినిమాలోని ‘నాటు నాటు’ పాటకి బెస్ట్ ఒరిజినల్ సాంగ్ కేటగిరీలో అవార్డు వచ్చిన విషయం తెలిసిందే. దాంతో ఆర్ఆర్ఆర్ టీమ్‌తో కలిసి రామ్ చరణ్ కూడా సతీసమేతంగా అక్కడికి వెళ్లాడు. ఈ నేపథ్యంలో రెండు సినిమాలనూ అక్కడే రామ్ చరణ్ చూసే అవకాశం ఉంది.

Read Latest Telugu Movies News , Telugu News