Sye Raa Teaser: సింహంలాంటోడు దొర.. కనుమరుగైన వీరుడి కథ!

మెగా అభిమానులతో పాటు తెలుగు సినీ ప్రేక్షకులు ఎప్పుడెప్పుడా అని ఎదురుచూస్తోన్న ‘సైరా’ టీజర్ వచ్చేసింది. ఇప్పటి వరకు ఉన్న అంచనాలను మించి అద్భుతమైన విజువల్ వండర్‌తో ఈ చారిత్రక సినిమా టీజర్‌ను ప్రేక్షకులకు అందించారు. పవర్ స్టార్ పవన్ కళ్యాణ్ వాయిస్ ఓవర్‌తో ప్రారంభమైన టీజర్ కేవలం 1.47 నిమిషాలే అయినా రోమాలు నిక్కబొడిచే యాక్షన్ సీక్వెన్స్‌లు, డైలాగులతో అబ్బురపరిచింది. ఇప్పటి వరకు చూడని పోరాట యోధుడి లుక్‌లో చిరంజీవి వహ్వా అనిపించారు. ఆయన చేసిన స్టంట్స్ ఆశ్చర్యానికి గురిచేస్తున్నాయి.


‘‘చరిత్ర స్మరించుకుంటుంది.. ఝాన్సీ లక్ష్మీభాయి, చంద్రశేఖర్ ఆజాద్, భగత్ సింగ్ లాంటి ఎందరో మహనీయుల ప్రాణ త్యాగాలను. కానీ, ఆ చరిత్రపుటల్లో కనుమరుగయ్యాడు ఒక వీరుడు.. ఆంగ్లేయులపై తొలిసారి యుద్ధభేరి మోగించిన రేనాటి సూర్యుడు..’’ అంటూ పవన్ కళ్యాణ్ గాత్రంతో అద్భుతమైన విజువల్స్‌తో టీజర్ మొదలైంది. ‘హు ఈజ్ దిస్ నరసింహారెడ్డి?’ అంటూ బ్రిటిష్ అధికారి అన్నప్పుడు ఉదయించే సూర్యుడిని చీల్చికుంటూ గుర్రంపై ఆ వీరుడు వస్తోన్న దృశ్యం టీజర్‌కే హైలైట్.

Also Read: మెగా పవర్.. ‘సాహో’ని మించి ప్లాన్ చేస్తోన్న రామ్ చరణ్!

‘‘సింహంలాంటోడు దొర. అతడే వాళ్ల ధైర్యం దొర’’ అంటూ వచ్చే వాయిస్ ఓవర్.. ఆ సమయంలో వచ్చే విజువల్స్ అద్భుతం. మొత్తంగా టీజర్ అద్భుతం, అమోఘం. ఈ టీజర్‌తో సినిమాపై చాలా మందికి ఉన్న అనుమానాలను పటాపంచలు చేశారు దర్శకుడు సురేందర్ రెడ్డి. ఆయన టేకింగ్ ఎలా ఉందో టీజర్‌ను చూస్తుంటేనే అర్థమవుతోంది. ఇక అక్టోబర్ 2న థియేటర్ యుద్ధమే..! టాలీవుడ్‌లో మళ్లీ రికార్డుల వర్షమే..!

ఈ సినిమాలో అమితాబ్ బచ్చన్, నయనతార, తమన్నా, కిచ్చ సుదీప్, జగపతిబాబు, విజయ్ సేతుపతి, రవి కిషన్ ముఖ్య పాత్రలు పోషించారు. కొణిదెల ప్రొడక్షన్ కంపెనీ బ్యానర్‌పై రామ్ చరణ్ ఈ చిత్రాన్ని నిర్మిస్తున్నారు. భారీ బడ్జెట్‌తో తెరకెక్కుతోన్న ఈ చిత్రం తెలుగుతో పాటు హిందీ, తమిళం, కన్నడ, మలయాళ భాషల్లో విడుదలవుతోంది. ఈరోజు టీజర్‌ను కూడా ఐదు భాషల్లో విడుదల చేశారు.